VOV4.Xơ Đăng - Tung pơla kố nah tơdroăng pơkuâ tơnêi tơníu a kong pơlê Kon Tum hiăng hlo hên tơdroăng ki ối tơvâ tơvân, tá hâi tơtro, thăm nếo mơhnŏng ‘’ôh tá vâ pêi tơleăng lĕm’’. Chiâng pro mơ’nhê tơnêi tơníu, tro lŭp tơmeăm khoăng tơnêi têa, pro hên kuăn pơlê kơdroh tơdroăng loi tơngah a khu ki pêi cheăng pơkuâ tơnêi tơníu dêi kong pơlê.

Kơtăn kố 4 khế, tung pơla pro hlá mơ-éa mơnhên xúa tơnêi ăm ƀăng tơnêi dêi rơpŏng hngêi dế ối, nâ Nguyễn Thị Thanh Thúy ối a cheăm Chư Hreng, pơlê kong kơdrâm Kon Tum châ ‘nâi tơnêi hngêi tơná hiăng châ kơ koan khu râ pơkuâ cheăm  pro ăm tro chêh tơchoâm ƀă ƀăng tơnêi dêi mơngế ki ê.

“Drêng á châ ‘nâi mê a xuân pro hlá đơn pơtroh ăm pâ Vi ƀan cheăm. Vi ƀan cheăm tiâ tiah kố, ngin ôh tá ‘nâi ôh tá xê tơdroăng cheăng ngin ôh vâ rơnêu pro. Vâi thế a pro đơn pơtroh ăm Vi ƀan pơlê kong kơdrâm. Hiăng môi khế kố la hâi hlo Vi ƀan pơlê kong kơdrâm tiâ. Pơla hdrối kố nah lăm trâm mâ kuăn pơlê a xuân hiăng tối tơdroăng mê, mâu kăn tối tơdroăng kô ôh tá ai tơdroăng pá klâi ôh.

Pro hlá mơ-éa chêh tối ăm râ kơpêng ah râ kơpêng kô pro ăm ôh tá xơpá ki klâi. Hmôu pơ tơpui klêng tê, á ối vâ pêi cheăng, chĕm mơ’drêh dêi kuăn ‘nĕng nếo”.

Nếo achê kố roh hôp má 3, Hô̆i đong kong pơlê Kon Tum hneăng má 12, Kăn hnê ngăn Đảng ủy kong pơlê, Kăn hnê ngăn Hô̆i đong kong pơlê Kon Tum Dương Văn Trang tối, tơdroăng Vi ƀan pơlê kân Đăk Hà, tơring Đăk Hà ăm pôa Đỗ Trọng Lâm, a troăng Hùng Vương mung tơnêi ing hơnăm 2017. Nôkố a tơnêi ki kố pôa Lâm hiăng ok ƀê tông tâi tâng tơnêi a kĭng têa krông, meăn pro kơnâng kơpêng vâ mơdró.

Pôa Ka Ba Thành, Kăn hnê ngăn Đảng dêi tơring Đăk Hà tối tơdrăng: tơdroăng ki mâu kăn pro mê hiăng tơdjâk kân pro kuăn pơlê chiâng ôh tá vâ nhoăm loi kơ mâu kăn cheăm, tơring.

“Mâu kuăn pơlê akố hlo tiah kố tâng mâu kăn cheăm, tơring ôh tá ăm ai tơdroăng ki tơná ngế kuăn pơlê ki mê hmôu pơ tí tăng mơjiâng pro xêh tâi tơdroăng mê.ƀă klêi tí tăng ngăn nếo, cho ‘nâng pơlê kân râk ngăn ôh tá krâu. Drêng châ ‘nâi tơdroăng mê ôh tá vâ rĕng bro nếo hlá mơ-éa hmôu pơ ối ăm pôa mê mơjiâng pro tơmeăm khoăng chiâng pro ai tơdroăng kuăn pơlê nhôm mâu kăn cheăm, tơring veăng châ kâ kơhveăm kâ kơluâ’’.

Ƀăng tơnêi nâ Nguyễn Thị Thanh Thúy tro kơ koan khu râ pơkuâ cheăng pro ăm tro chêh tơchoâm ƀăng tơnêi ngoh Nguyễn Tăng Trung

Tơdjâk troh tơdroăng rak ngăn tơnêi a Kon Tum, a tơdroăng mơdêi séa ngăn kơxô̆ 222 hâi lơ 18/2/2022 dêi Ngế xiâm ngăn Chin phuh hiăng tối nhên hên tơdroăng ki ối ‘ro, ki lot tung tơdroăng pro hlá mơ-éa, pro xôi, môi tiah pơla hơnăm  2016 - 2019 Vi ƀan kong pơlê Kon Tum hrá kĭ pơkâ xúa tơnêi ăm 10 tơring, pơlê kong kơdrâm; 85 ngế, pơcháu tơnêi ôh tá tơbleăng ing tơdroăng yă tơnêi a tơring Đăk Hà; Tơdroăng tơkêa pro tê mơdró, xah hêi ƀă pro hngêi kơphô̆ xua kŏng ti veăng tơlo liăn dêi Grup FLC pro xiâm pơkuâ ‘no liăn mơjiâng pro hâi pê klêi la Bơrô pro hlá mơ-éa chêh mơnhên xúa tơnêi pêi kâ, tơnêi hngêi ối, mâu hngêi ối, tơmeăm khoăng rơtế ƀă tơnêi, ƀă hiăng tăng pro klâ tơnêi ki lối 17 rơpâu 600m2; Tơdroăng pơcháu tơnêi ăm 43 ngế a Kơpong kơphô̆ peăng Hdroh kông Đăk Bla, pơlê kong kơdrâm Kon Tum ôh tá xê mâu ngế ki tro chêl thiăn xua xo tơvêh tơnêi….

Tơdrêng amê, mâu tơdroăng ôh tá rơkê, ôh tá hlê, ối lot, pro ôh tá tro tung pro hlá mơ-éa pơkâ, rak ngăn, xo tơvêh tơnêi xuân môi tiah tơdroăng hrá ‘mâi rơnêu drêng mơhno drêng hiăng ‘nâi, tơleăng mơnhên chêh pro ôh tá tro pro hên ngế kuăn pơlê a Kon Tum oh tá hêng vâ loi kơ mâu kăn ƀô̆ pêi hneăng cheăng rak ngăn tơnêi dêi cheăm tơring kong pơlê kố.

Nâ Phạm Thị Vân Kiều, hngêi ối a pơlê kong kơdrâm Kon Tum ai tơnêi chêh tơchoâm tung tơnêi ki ai pơkâ hdró vâ pro tơmeăm khoăng ki ê tối.

“Ulâi xuân lôi ai pơkâ. Kuăn pơlê púi vâ châ rêh ối a tơnêi dêi tơná vâi, la nôkố pơkâ ôh tá ăm pro ti lâi ôh tá ‘nâi, tơdroăng ki kuăn pơlê vâ loi kơ mâu kăn bô̆ mê alâi ah nếo, tíu ki lâi vâi xuân tối ai pơkâ hdró, tíu ki lâi xuân tối xo tơvêh’’.

Pôa Phạm Văn Trúc, kăn ƀô̆ pơtê cheăng xúa hơnăm hiăng krâ ối a kơxô̆  hngêi 217 troăng Hùng Vương, pơlê kân Đăk Hà, tơring Đăk Hà tối:

“ Tíu xiâm pêi cheăng kơtăng, kuăn pơlê ngin loi. La ai mâu kuăn pơlê ki ‘nâ, ƀă môi đảng viên ki ‘nâ tung kong pơlê Kon Tum a hlo tơdroăng kố ƀă kong pơlê hâi vâ tơmâng khât to lâi. To lâi tơdroăng cheăng hiăng hlo rế hên klêi séa ngăn, tí tăng ngăn hiăng mơhno ăm hlo mâu tơdroăng, mê cho mâu tơdroăng ki hâi châ pêi. Ai mâu tíu tơbleăng mâu tơdroăng tối xơpá luâ râ chôa pêi i-iâ. Púi vâ tơdroăng kô thế pêi pro troh tui lui hlối’’.

Tơnêi Vi ƀan pơlê kân Đăk Hà ăm mung pêi châ pôa Đỗ Trọng Lâm mơjiâng pro tíu tê mơdró Con Cưng vâ tê mơdró tơmeăm

Achê pơla kố a mâu rôh hôp, môi tiah: Rôh hôp má 3, Hô̆i đong hnê ngăn kong pơlê Kon Tum hneăng 12; Hneăng hôp tơpui tơno dêi Vi ƀan kong pơlê Kon Tum ƀă Khu mơdró; Hneăng hôp dêi khu ủy kong pơlê Kon Tum tối tơdroăng’mâi hơ’lêh luât cheăng, ‘mâi hơ’lêh tơodroăng ‘no liăn cheăng…

Kăn hnê ngăn Đảng ủy kong pơlê, Vi ƀan hnê ngăn, Hô̆i đong hnê ngăn kong pơlê Kon Tum hiăng mơhno ki mơ-eăm khât tung tơdroăng tơleăng mơnhên tơdroăng xôi, tơkâ luâ xơpá, tơvâ tơvân, tơleăng mơnhên klêi mâu tơdroăng ki pro pá, tơvâ tơvân tung pơla kuăn pơlê, khu mơdró lăm pro hlá mơ-éa tơdjâk troh tơnêi têa.

Laga vâ xo tơdroăng tuăn loi dêi kuăn pơlê ’na rak ngăn tơnêi mê bú mơ-eăm tê la hâi bê, mâu Khu râ pơkuâ cheăng, mâu kăn cheăm, tơring, kong pơlê Kon Tum kal thế rak tơniăn pôi tá lôi tơdroăng ki mơ-eăm hnê mơhno dêi râ kơpêng trâm tơdroăng ‘’ kơpêng tô pá xôp hngíu’’ tôu hơkâ  piu loăng tôu’’.

Khoa Điềm chêh

Gương tơplôu tơbleăng