Klêi kơ’nâi môi hâi riân ngăn mâu tơdroăng ki tro lŭp, tối tơbleăng sap ing Ƀơrô cheăng kâ pơlê kong kơdrâm Kon Tum, kong pơlê Kon Tum ăm hlo rôh kong mêi ai kơdrế, kong mê príu a kơxê măng hâi lơ 23/4 a pơlê kong kơdrâm hiăng pro lŭp vâ chê 6,8 rơtal liăn. Tro lŭp hên má môi xua rôh kong mêi kơdrế, kong mêi príu a pơlê kong kơdrâm Kon Tum cho kơvâ pêi chiâk deăng. Tiô riân ngăn dêi Ƀơrô ngăn cheăng kâ pơlê kong kơdrâm, ai lối 160 ha klâng báu hiăng vâ troh hâi poê mê tro tơ’nhiê xua kong mê príu, ki hên tro tơ’nhiê lối 70%.

Rơtế ƀă ƀăng klâng báu, kong mêi príu xuân hiăng pro tơ’nhiê dâng 2,5 ha krui kơxái ƀă lối 6 ha kơchâi răng, prá alâi. Khu kăn pơkuâ pơlê kong kơdrâm rơtế ƀă kuăn pơlê rĕng ‘mâi mơnhông kế tơmeăm klêi kơ’nâi rôh kong mê príu ƀă hnê pơchân kuăn pơlê hbrâ ví ƀă kong prâi ki tô ó, ki pơhlêh rơnó sap ing tô chiâng mêi.