VOV4.Xơ Đăng - Tơdroăng ki tŏng kum hnê, mơnhông mâu ngế cheăng ăm kong têa Lếo hiăng pêi pro kơtăng tơ’nôm tơdroăng tơrŭm, achê, tơrŭm tơroâ pơla Việt Nam – Lếo. Lối chât hơnăm hdrối kong pơlê Kon Tum cho tíu troh dêi hên sinh viên Lếo. Ƀă mâu sinh viên Lếo, mâu ngế ki djâ tơvế ivá mơ-eăm lăm ngi Việt Nam hriâm tâp, tơmâng xo mâu tơdroăng ki hnê rơkê vâ vêh dêi kong têa veăng kum ivá mơjiâng, mơnhông tơnêi têa, mê Kon Tum, kơpong tơnêi ối ai hên tơdroăng ki xơpá a kơpong Tây Nguyên cho tơdroăng ki tiah hmâ hiăng chiâng pơlê xiâm má péa dêi vâi.

Mâu hơnăm achê kố, Hngêi trung Đăi hok Đà Nẵng ki po a Kon Tum cho tơdroăng rah xo dêi hên sinh viên Lếo. Nôkố, tơdroăng prôk lăm ing 4 kong pơlê peăng Hdroh tơnêi têa dêi kong têa pú hmâ, mê cho: Attapeu, Sekong, Champasak ƀă Saravane ƀă kong pơlê Kon Tum cho tơ’lêi hlâu. Rơtế ƀă hngêi trung Đăi hok Đà Nẵng po a Kon Tum dế hnê mơjiâng hên kơvâ cheăng, môi tiah: luật, tài chính, quản trị kinh doanh, kế toán ƀă hía hé tơxâng tơdroăng kal vâ mơjiâng mơngế pêi cheăng dêi kong têa pú hmâ.

Nôkố hngêi trung dế ai 160 ngế sinh viên Lếo tiô hriâm, tung mê sinh viên châ kâ hnoăng liăn hriâm rơkê ing kong pơlê Kon Tum, Gia Lai ƀă kơlo tŏng kum ing 2 kong pơlê cho 100% ƀă dêi hngêi trung kuăn cho 50% kơxô̆ liăn hriâm tâp. Mâu vâi o ôh tá ai hnoăng liăn hriâm rơkê lăm hriâm mê mơ’no xêh liăn ngân vâ hriâm tâp, ôu kâ.

Thái cô rơtế ƀă sinh viến Lếo pêi pro leh ƀá prế a kŏng tung hâi Têt tiô khôi vâi krâ nah Bunpimay

Cô Võ Thị Thanh Thảo, Kăn pơkuâ Ƀơrô pêi cheăng hok tro, sinh viên Hngêi trung kuăn Đăi hok Đà Nẵng a Kon Tum tối ăm ‘nâi, hngêi trung đi đo tơmâng, kơjo ăm mâu sinh viên Lếo sap ing apoăng mâu vâi o troh a Kon Tum:

‘’Vâ kum ăm mâu pú hmâ ai tíu trâm mâ hriâm tâp mê Hngêi trung xuân ăm mâu sinh viên kong têa Lếo ối a kơpong hngêi sinh viên Việt Nam ối, pro ăm mâu sinh viên Lếo ai môi tíu lĕm má môi. Pakĭng chôu hriâm a lâm mê mâu pú hmâ kô veăng mâu tơdroăng dêi sinh viên Việt Nam ƀă tâi tâng mâu ƀơrô, kơvâ cheăng kô tŏng kum ăm mâu pú hmâ lĕm, tŭm má môi’’.

Sinh viên Lếo châ tâ tơdroăng kơxuô kơƀăn tơxông tung Têt tiô khôi vâi krâ nah Việt Nam

Ƀă mâu sinh viên Lếo dế hriâm a Hngêi trung kuăn Đăi hok Đà Nẵng a Kon Tum, tung pơla lối 2 hơnăm pơreăng COVID-19 xông tâ tú rơdêi cho tơdroăng ki ôh tá kâi piu ƀă mâu vâi o. Pơreăng pro sinh viên Lếo ôh tá châ vêh lăm pôu dêi nôu pâ nhŏng o a hngêi xuân môi tiah kơdroh tơdroăng prôk lăm vâ tơniăn tơdroăng hbrâ mơdât pơreăng. Mâu thái, cô yăo tung hneăng nôkố hiăng chiâng ngế pâ, ngế nôu rế mơhnhôk hiâm mơno, rế tŏng kum mâu vâi o hriâm tâp tơdah mâu tơdroăng ki rơkê tung ngôa.

Ngế droh sinh viên inâi Vongkhamlar Thipphada, hngêi ối a kong pơlê Saravane dế hriâm hơnăm má 4, kơvâ Luât cheăng kâ vêh pâ, o ôh tá ƀĕng ê drêng châ tơdah Têt tiô khôi vâi krâ nah Bunpimay, châ veăng leh xối xeăng kơmăng vâ mot hơnăm nếo, kât kơxái pré ƀă rơtế kơhnhon xuâng lăm vông a Việt Nam. Hlo mâu vâi o sinh viên ôh tá chiâng vâ vêh a tơnêi têa tơdah Têt, mâu thái cô hiăng khŏm mơ-eăm kum mâu vâi o châ rêh tung tơdroăng nhuô̆m pâ dêi pơlê xiâm ƀă kơdroh tơdroăng ki pâ hngêi.  

Ngế droh sinh viên Vongkhamlar Thipphada rơrêk tung hiâm mơno:

“Thái cô, hngêi trung tơkŭm po Têt Lếo ăm ngin o a Việt Nam cho ro ‘nâng ƀă lĕm ‘nâng. Ai kơxuô tơmeăm diâp ăm ngin o nếo. Pâ hngêi ‘nâng laga ai thái cô amê xuân chiá tâ iâ. Thái cô kum ngin o cho hên ‘nâng. Ngin o pá puât kô chiâng tơpui tối ƀă thái cô, tâng ai ivá mê thái cô xuân kum ngin o tâi tâng’’.

Thái hnê Hngêi trung kuăn Đăi hok Đà Nẵng a Kon Tum đi đo tơpui tơno tơdroăng hriâm tâp ƀă sinh viên Lếo

Ƀă tơdroăng tŏng kum dêi mâu thái cô Hngêi trung kuăn Đăi hok Đà Nẵng a Kon Tum, tâi tâng mâu sinh viên Lếo pơrá kơhnâ hriâm tâp ƀă tơdah xo tơdroăng ki rơkê tung ngoâ. Thongkhamsouk Koungthong, sinh viên hơnăm má 4, kơvâ Kŏng ngê̆ thong tin tối ăm ‘nâi, hngêi o a kong pơlê Champasack, nôu pâ pêi chiâk deăng xua mê tơdroăng cheăng kâ rơpŏng pá puât. Ing mơ-eăm dêi châ tơná mê o ai ivá vâ lăm a Việt Nam hriâm tâp tiô tơdroăng tơná pói vâ.

Châ hriâm tâp, châ tâ tung tíu rêh ối lĕm, pêng păm tơdroăng tuăn pâ dêi thái cô, pú hmâ Thongkhamsouk Koungthong khŏm mơ-eăm hriâm tâp ƀă hlo loi tơngah a châ tơná. Thongkhamsouk Koungthong tối tơdroăng tơmiât ƀă tá mâu tơdroăng vâ pêi tung la ngiâ dêi tơná:

“Mâu pú hmâ Việt Nam ƀă ngin o cho lĕm ‘nâng ai ki klâi xuân kum ‘na tơdroăng hriâm tâp. Kơvâ kố á hlo cho tâng pơchông ƀă kơvâ ki ê xuân pá laga á thế mơ-eăm hriâm tâp. Ƀă á o cho hriâm tâp a Việt Nam xuân cho lĕm tâ a peăng kong têa Lếo. Á hlo kơvâ Kŏng ngê̆ thong tin nôkố dế mơnhông mơdêk ƀă ai hên kŏng ti dế kal mơngế hriâm kơvâ kŏng ngê̆ thong tin. Á tơmiât cho la ngiâ mơgêi hriâm lo hngêi trung á kô pâ pêi cheăng a Lếo. Á kô tơbleăng mâu vâi o nếo mơgêi hriâm a Lếo kô tơbleăng vâi lăm hriâm a Việt Nam cho lĕm tâ’’.

Nhên khât ăm hlo tơdroăng tŏng kum hnê, mơjiâng mơngế pêi cheăng ăm tơnêi têa pú hmâ Lếo cho môi tơdroăng ki lĕm dêi tơdroăng tơrŭm môi tuăn, nhŏng o, môi hiâm mơno ki phá tơ-ê Việt Nam – Lếo. Mâu hngêi trung Cao đẳng, Trung cấp nghề dêi kong pơlê Kon Tum ƀă nôkố ai tơ’nôm hngêi trung kuăn Đăi hok Đà Nẵng to lâi chât hơnăm hiăng hluâ hiăng cho tíu troh dêi hên sinh viên kong têa Lếo.

Ƀă mâu vâi hdrêng sap ing tơnêi têa rơtuh to kuăn rui djâ tơdroăng khŏm mơ-eăm troh a Việt Nam hriâm tập, tơdah xo tơdroăng ki rơkê vâ vêh veăng mơjiâng, mơnhông mơdêk tơnêi têa Lếo mê Kon Tum, kơpong tơnêi ối hên pá puât a kơpong Tây Nguyên môi tiah chiâng xêh hiăng chiâng pơlê xiâm má péa dêi vâi.

Khoa Điềm chêh

A Sa Ly tơplôu ƀă tơbleăng