Tơdroăng ăm ‘nâi sap ing Khu ngăn hnê hriâm ƀă hnê mơjiâng tuăn ngoâ rơkê kong pơlê Kon Tum ăm hlo, ƀă râ mầm non nôkố kong pơlê ối kal vâ chê 700 ngế cô, Râ má môi ối kal 447 ngế, Râ má péa ối kal vâ chê 500 ngế ƀă râ má pái phôh thong ối kal 43 ngế. Vâ ‘mâi mơnhông tơdroăng ki ối kal thái cô, kơvâ ngăn hnê hriâm ƀă hnê mơjiâng tuăn ngoâ rơkê kong pơlê Kon Tum pêi pro xing xoăng, ‘mot tơrŭm mâu tíu hnê hriâm mầm non, phôh thong công lập ki kŭn.

Xing xoăng, rah xo tơdâng mâu kăn ƀô̆ rak ngăn thái cô, mâu ngế cheăng a tơrêm tơring, ‘mâi mơnhông tơdroăng ki rơlối, ối kal mâu thái cô a mâu cheăm tơring; Xing xoăng thái cô râ trung hok phôh thong hnê mâu tiêt a râ má péa, thái cô râ má péa hnê a mâu tiết a râ má môi.

Pôa Thái Khắc Hòa, ngế ki pơkuâ ƀơrô ngăn hnê hriâm ƀă hnê mơjiâng tuăn ngoâ rơkê pơlê kong kơdrâm Kon Tum ăm ‘nâi, lâp pơlê kong kơdrâm ối kal vâ chê 160 ngế thái cô vâ hnê a lâm, mê troăng hơlâ cho:

“Vêh xing xoăng lâm vâ xing xoăng mâu thái cô rak tơniăn lâm tơtro a mâu hngêi trung. Pêi pro tơdroăng ‘mot tơkŭm tíu hnê ki kŭn tơkŭm a tíu hnê ki xiâm hiăng ‘mot tơrŭm châ 7 tíu tung mê ai 2 tíu hnê mầm non ƀă 5 tíu hnê râ má môi.

Pêi pro tơdroăng ki pơ’lêh thái cô sap ing hngêi trung ki rơlối thái cô vâ xing xoăng ăm tơtro ‘na hnoăng cheăng pơla mâu hngêi trung. Ƀă mâu khu môn ki ối kal thái cô môi tiah môn Tin học, nâl Ănglê râ má môi kơvâ cheăng hiăng xing xoăng thái cô hnê a mâu hngêi trung. Pakĭng mê, kơvâ cheăng hiăng tơbleăng xing xoăng thái cô hnê Tin học, nâl Ănglê râ má péa hnê Tin học, nâl Ănglê a râ má môi’’.

Cô Cao Thanh Diễm Quỳnh hnê nâl Ănglê a 2 to hngêi trung râ má môi a Kon Tum

A Gia Lai, nôkố xuân dế ối kal lối 3.700 ngế thái cô hnê a lâm. Pôa Phạm Văn Đại, ngế pơkuâ ƀơrô ngăn hnê hriâm ƀă hnê mơjiâng tuăn ngoâ rơkê tơring Ia Grai ăm ‘nâi, nôkố ối kal vâ chê 300 ngế thái cô. Pêi pro tiô pơkâ dêi Tơdroăng hnê hriâm phôh thong tâi tâng 2018, hơnăm hriâm 2022 – 2023 la ngiâ cho hơnăm ki apoăng môn hriâm Ănglê prế Tin học chiâng môn hriâm ki pơklât thế sap ing lâm 3 a râ má môi, teăng ăm tơdroăng ki rah xo môi tiah hdrối nah.

Ki khât gá pro tơring sap ing nah ki ôh tá bê thái cô mê nôkố rế pơtối trâm pá drêng tá hâi pêi pro châ tŭm kơxô̆ ngế thái cô pơkuâ 2 khu môn ki kố.

“Nôkố xơpá dêi kơvâ ngăn hnê hriâm ƀă hnê mơjiâng tuăn ngoâ rơkê tơring Ia Grai cho pêi pro tơdroăng ki hriâm hlá mơ-éa hriâm ki nếo ƀă mâu khu môn Ănglê lâm 2 ƀă tin học lâm 3 nôkố gá ối kal. Ƀă tâi tâng kơxô̆ ngế thái cô hnê nâl Ănglê ối kal hên tung môi hngêi trung hriâm cho 5 to hngêi trung tá hâi ai thái cô hnê nâl Ănglê ƀă 8 to hngêi trung hnê Tin học mê gá xơpá khât’’.

Pôa Nguyễn Đình Thức, ngế ki pơkuâ Ƀơrô ngăn hnê hriâm ƀă hnê mơjiâng tuăn ngoâ rơkê pơlê kong kơdrâm Plei Ku mê ăm ‘nâi, pơlê kong kơdrâm kố ối kal dâng 600 ngế thái cô. Vâ rak tơniăn ki rơkê tung hnê ƀă hriâm, kơvâ ngăn hnê hriâm ƀă hnê mơjiâng tuăn ngoâ rơkê tơtrŏng troh tơdroăng ki xing xoăng, tơniăn mâu thái cô a mâu hngêi trung. Tơdrêng a mê tung tơdriăng ƀiên chê̆ châ pơcháu, hbrâ rơnáu hnê hợp đồng ƀă mâu thái cô ƀă mâu ngế cheăng ki ối kal.

“Ƀơrô hiăng pêi cheăng ƀă mâu hngêi trung vâ séa ngăn mâu hngêi trung lâm ƀă xing xoăng thái cô a mâu hngêi trung. Hlo tơdroăng ki ối kal thái cô hên môi tiah kố mê hiăng tơpui tơno ƀă mâu hngêi trung xing xoăng lâm hriâm, tơkŭm mâu hngêi trung tiô túa ki tơtro vâ kơdĭng thái cô châ pơcháu tung ivá pơkuâ.

Ƀơrô xuân pâ thế mâu rêm râ ai hnoăng cheăng séa ngăn tung tơdroăng pơkâ dêi kơvâ dêi tơnêi têa vâ xing xoăng tŭm kơxô̆ ngế thái cô xuân môi tiah mâu ngế cheăng tung hngêi trung ăm mâu hngêi trung vâ tơbleăng hnê ƀă hriâm’’.

Lâp kong pơlê Dak Lak ối kal pa 1.260 ngế thái cô sap ing Mầm non troh râ má pái phôh thong

Pôa Lê Duy Định, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai ăm ‘nâi dế tơrŭm ƀă Khu ngăn mâu kong pơlê, tơring cheăm ƀă hnoăng cheăng mâu kăn ƀô̆ pêi cheăng ƀă mâu cheăm tơring vâ séa ngăn, tí tăng ‘nâi plĕng ăm Vi ƀan hnê ngăn kong pơlê pơkâ tơdroăng ki xing xoăng tơtro ƀă tơkŭm mâu hngêi trung, mâu tíu hnê, mơdêk kơxô̆ hok tro hriâm tung môi lâm troh a kơlo ki hên tiô pơkâ rêm râ hriâm.

Klêi kơ’nâi pêi klêi mâu tơdroăng ki xiâm nếo séa ngăn tơdroăng cheăng ki ối kal, lơ hiăng tŭm thái cô a mâu cheăm tơring vâ xing xoăng 1.244 ngế ki Tơnêi têa pơcháu.

“Ƀă mâu lâm a râ má môi athế ai 35 ngế hok tro tung môi lâm, ƀă mâu lâm a râ má péa cho athế ai 45 ngế hok tro tung môi lâm. Mâu tơring pêi pro tơdroăng ki ‘mot tơrŭm mâu tíu ki hnê hriâm xuân môi tiah rak tơniăn kơxô̆ hok tro ai mâ a lâm môi tiah mê kô kơdĭng châ mâu thái cô hên. Drêng châ ‘mot tơ’nôm mâu thái cô ƀiên chê̆, tơ’nôm ƀă tơdroăng ki ‘mot tơrŭm mâu tíu hnê xuân môi tiah xing xoăng kơxô̆ hok tro a lâm mê rôh ki tơ’lêi hlâu ‘na hnê hriâm a kong pơlê Gia Lai kô ai tŭm thái cô hnê a lâm’’.

Rơtế ƀă mâu troăng hơlâ ki pêi pro pơtân, vâ pơkâ tơleăng mâu tơdroăng ki xơpá ki ối kal thái cô kố, Khu ngăn hnê hriâm ƀă hnê mơjiâng tuăn ngoâ rơkê mâu kong pơlê tung kơpong Tây Nguyên xuân hiăng pâ thế Khu xiâm ngăn hnê hriâm ƀă hnê mơjiâng tuăn ngoâ rơkê tí tăng ‘nâi plĕng Chin phuh ‘mot tơ’nôm ƀiên chê̆ tơdroăng cheăng hnê hriâm ki ối kal thái cô. Ai troăng hơlâ rah xo viên chưk ƀă mâu sinh viên sư phạm pơkâ 116 dêi Chin phuh vâ tơ’lêi hlâu ăm kong pơlê ‘na kơxô̆ ki rah xo mâu ngế pêi cheăng.