A kong pơlê Kon Tum tơdroăng hbrâ ăm Hneăng tơ’noăng mơgêi râ má pái phôh thong hơnăm 2023 dế châ khu râ kăn pơkuâ ƀă kơvâ hnê hriâm - hnê mơjiâng kong pơlê po rơdâ pêi pro thâ, pêi kêi đeăng rêm tơdroăng, rak tơniăn hneăng tơ’noăng tơkŭm po tơniăn, kơtăng, dâi lĕm. Vâ hneăng tơ’noăng tơkŭm po tơniăn, kơtăng, châ tơƀrê, troh nôkố, Khu hnê mơhno Hneăng tơ’noăng mơgêi râ má pái phôh thong kong pơlê Kon Tum hơnăm 2023 hiăng tơkŭm po roh séa ngăn tơdroăng hbrâ 12 tíu tơ’noăng, kơpong in đê tơ’noăng; tơkŭm po hnê mơhno tơdroăng séa ngăn tơ’noăng mơgêi râ má pái râ má pái thôh thong ăm kăn ƀô̆, thái cô pêi tơdroăng ngăn tơ’noăng, châm điêm.

Rơtế ƀă mê Khu pơkuâ hnê hriâm ƀă Hnê mơjiâng tuăn ngôa rơkê mâu hngêi trung pơtối tơkŭm po lĕm tro tơdroăng hriâm tơ’nôm, hnê tơ’nôm ƀai hriâm ăm hok tro veăng tơ’noăng, ki má lối a mâu hngêi trung kơdrâm hdroâng kuăn ngo.

Hneăng tơ’noăng mơgêi râ má pái phôh thong ƀă lối 160 ngế hok tro veăng tơdroăng hnê hriâm đi đo. Kơxô̆ hok tro hdroâng kuăn ngo veăng hneăng tơ’noăng ai lối 1.700 ngế o, hok tro pa kong vâ chê 220 ngế. Kong pơlê Kon Tum hiăng mơjiâng 12 tíu tơ’noăng, tung mê, ai 5 tíu tơ’noăng a pơlê kong kơdrâm Kon Tum, 7 tíu tơ’noăng a mâu tơring ƀă mơngế ngăn tơ’noăng tŭm a mâu tíu tơ’noăng cho lối 900 ngế.