Klêi kơ’nâi lối 1 khế pêi pro, khu ki rơnêu hiăng pêi kêi đeăng tơdroăng rơnêu tơmeăm mơdât tơhnâp kĭng têa kroăng Pô Kô a tơring Đăk Glei. Pơtối mê, tíu ki rơnêu hiăng pêi kêi đeăng rơnêu tíu tơ’nhê a kuâ ƀă a ‘nâi ƀă xŏn dâng 60 met. Tâi tâng kơxô̆ liăn vâ rơnêu tơmeăm tơ’nhê a kố cho vâ chê 1 rơtal liăn.

Laga. tơmeăm kế mơdât tơhnâp kĭng têa kroăng Pô Kô châ pro kơtăn kố 14 hơnăm, xŏn vâ chê 2 km, tâi tâng kơxô̆ liăn mơ’no lối 93 rơtal liăn kơxô̆ liăn Tơnêi têa. Krê tơmeăm kế kâng tât tơhnâp peăng mâ hâi Lo ai kơpong tơ’nhê tiô tối hdrối ki kơnâ lối 37 rơtal 700 rơtuh liăn. Hơnăm 2013 tơmeăm kố thế pơtê mơjiâng pro ƀă ki kơnâ mơjiâng pro hiăng lối 25 rơtal liăn.

Troh hơnăm 2019, tơmeăm nếo châ Vi ƀan kong pơlê Kon Tum xing xoăng 12 rơtal liăn vâ mơ’no liăn mơjiâng pro mâu tơmeăm ki kal ki u ối. Mơ’nui hơnăm 2021 tơmeăm pêi kêi đeăng tơdroăng krâ mâu tơmeăm ki kal, laga troh nôkố xuân tá hâi mơnhên khu ki pơkuâ vâ pơcháu ăm xúa, mê hiăng ai tơdroăng tơ’nhê xua kong mêi têa kân lân lu xua mê khu ki rơnêi thế rơnêu.