Tơdrêng amê kheăn kơdeăn mâu khu pú hên, ngế krê ki kơhnâ rơkê tung hriâm tâp ƀă pêi tiô troăng tơdjâ Pôa Hồ.

2 hơnăm hiăng hluâ kong pơlê Kon Tum hiăng mơjiâng châ vâ chê 1.300 troăng pêi rơkê, troăng pêi châ tơƀrê tung hriâm tâp, pêi tiô troăng tơdjâ Pôa Hồ. Ki má môi cho troăng pêi ‘’Têng neng chuât hriâm tâp’’, ‘’Hngêi trung hơniâp lĕm’’ dêi kơvâ Hnê hriâm ƀă Hnê mơjiâng tuăn ngôa rơkê, ‘’Hâi pŭn tơmiât troh tíu pêi cheăng’’ dêi Đảng ƀô̆ tơring Đăk Glei, ‘’Vó phái tuăn pâ’’ dêi Đảng ƀô̆ tơring Ngọc Hồi’’...

Tơdroăng thăm mơdêk hriâm tâp ƀă pêi pro tiô troăng tơdjâ, hiâm mơno  Pôa Hồ hiăng kum mơdêk hlê plĕng, pôu râng hnoăng cheăng dêi mâu khu râ pơkuâ hnê ngăn cheăng Đảng, kơ koan, tíu cheăng tung pêi pro hnoăng cheăng kal kí châ pơcháu; pơhlêh tung tơdroăng pêi cheăng dêi khu kăn ƀô̆, kŏng chưk, viên chưk tiô troăng rế hía rế khoa hok, châ tơƀrê.

A hneăng hôp, Khu pơkuâ cheăng Đảng kong pơlê Kon Tum pơkâ thế mâu râ, kơvâ cheăng, kong pơlê, kơ koan, tíu cheăng tung kong pơlê pơtối pơhlêh nếo troăng pêi, mơdêk ki dâi lĕm vâ tơdroăng hriâm tâp ƀă pêi tiô troăng tơdjâ Pôa Hồ chiâng tơdroăng ki pêi pro xêh, pêi cheăng đi đo tung rêm kăn ƀô̆, đảng viên, kŏng chưk, viên chưk, mơngế pêi cheăng ƀă hía hé.

A hneăng hôp 21 khu pú hên ƀă 30 ngế krê hâk tơngăm châ tơdah Kơthô kheăn kơdeăn dêi Kăn pơkuâ hnê ngăn cheăng Đảng kong pơlê Kon Tum; 19 khu pú hên ƀă 26 ngế krê châ Vi ƀan kong pơlê Kon Tum diâp ƀâng kheăn kơdeăn.