Kơxê lơ 20/6, Khu ngăn mâu ngế chêh hlá tơbeăng kong pơlê Kon Tum tơkŭm po tơbâ 98 hơnăm Hâi hlá tơbeăng kăch măng Việt Nam 21/6 ƀă diâp Pri hlá tơbeăng kong pơlê Kon Tum rôh má 11. A rôh trâm mâ, lối 120 ngế hô̆i viên Khu chêh hlá tơbeăng kong pơlê Kon Tum ƀă mâu kăn hiăng rơtế hơ’muăn khôi hmâ khên tơnôu 98 hơnăm hlá tơbeăng Kăch măng Việt Nam mơjiâng ƀă mơnhông mơdêk. Tơpui a rôh trâm mâ, pôa Nguyễn Văn Hòa, Kăn phŏ pơkuâ ngăn Đảng Kon Tum tối nhên hnoăng cheăng ki kal dêi hlá tơbeăng tung pơkâ troăng tơbleăng tơdroăng kal, bro chiâng tơdroăng ki môi tuăn tung pơlê pơla, ‘mâi mơnhông tơdroăng ki tơngah dêi mâu rơxông kuăn pơlê tung tơdroăng pơkuâ dêi Đảng, pơkuâ ‘mâi rơnêu dêi Tơnêi têa veăng kum pêi pro ƀlêi chiâng mâu tơdroăng pơkâ, hnoăng cheăng mơnhông mơdêk cheăng kâ rêh ối pơlê pơla dêi kong pơlê.

Pri hlá tơbeăng kong pơlê Kon Tum rôh má 11 hiăng châ xo 60 ƀai tơ’noăng. Hô̆i đong Chung khảo tâ phĭu châ̆m điêm rah xo 27 to ƀai ki rơkê má môi vâ diâp pri. Drêng kố, Khu ngăn khu chêh hlá tơbeăng kong pơlê Kon Tum xuân hiăng diâp Kỷ niệm chương Xua tơdroăng cheăng chêh hlá tơbeăng Việt Nam dêi Khu chêh hlá tơbeăng Việt Nam ăm 2 ngế hô̆i viên.