A ilâng kiâ ‘mé mâu mố đô̆i hlâ ai hnoăng a tơring tơkăng kong Ngọc Hồi, Khu kăn Đảng kong pơlê, Hô̆i đong hnê ngăn kong pơlê, Vi ƀan hnê ngăn, Vi ƀan Măt trâ̆n tơnêi têa Việt Nam kong pơlê  Kon Tum tơkŭm po leh  pôu ngăn, tơbâ hnoăng, ‘mế 12 kơxêng kiâ mâu ngế ki pleăng hnoăng tơná, mơngế Viêt Nam ki rơkê  tung mâu rơxông tơplâ a Lếo ƀă Kul Đô̆i K53 tơkŭm po tung rơnó mơdrăng hơnăm 2022- 2023.

Tung Hlá mơ-éa pơchuât ngăn a Leh pôu ngăn, tơbâ hnoăng , ‘mế 12 kơxêng mơngế hlâ ai hnoăng, jâ Y Ngọc, Kăn phŏ hnê ngăn Vi ƀan kong pơlê, Ngế  pơkuâ Hnê mơhno 515 kong pơlê Kon Tum rơrế lo têa mâ: A ngiâ  kơxêng kiâ mâu ngế hlâ ai hnoăng, teăng mâ Đảng bộ, mâu kăn, mâu lêng ƀă kuăn pơlê mâu hdroâng kuăn ngo kong pơlê Kon Tum pâ mơhno hiâm mơno pâ nhoăm, mơnê hên pá kâi tối ƀă mâu ngế ki hlâ ai hnoăng - mâu ngế kuăn ki rơkê dêi hdroâng mơngế Việt Nam, mâu ngế hiăng ‘no hnoăng ối rơtăm ki lĕm dêi tơná hiăng tơplâ ta troh hlâ, xua tơdroăng pro tơleăng lĕm hdroâng mơngế ƀă tơdroăng tơrŭm  ƀă lâp plâi tơnêi. Troh nốkố tâi tâng 12 kơxêng kiâ mâu ngế hlâ ai hnoăng châ tơkŭm ‘mế mê xuân hâi teăm ‘nâi inâi.