Vâ tối tơbleăng, tơdjêp pêt mơngế pêi cheăng – peăng kal vâ mơngế pêi cheăng; pro tơ’lêi hlâu vâ mơngế pêi cheăng, đoân viên droh rơtăm châ achê tŭm, teăm tơdrêng tối tơdroăng tíu rah xo mơngế pêi cheăng ing mê rah xo châ tơdroăng pêi cheăng, cheăng pêi ki tơtro, hâi lơ 17/5, a pơlê kong kơdrâm Kon Tum, Khu pơkuâ cheăng pêi – Mô đô̆i rong râ ƀă Rêh ối pơlê pơla tơrŭm ƀă Tĭnh đoân Kon Tum tơkŭm po Hâi pêi cheăng hơnăm 2023 mơhnhôk kơdrâm mơngế pêi cheăng kal vâ ai cheăng pêi.

A Hâi pêi cheăng kong pơlê Kon Tum hơnăm 2023 ai 37 tíu cheăng, khu tê mơdró kĭ tơdroăng kal vâ rah xo mơngế pêi cheăng ƀă lối 3.200 tíu pêi cheăng, pêi cheăng tung kong pơlê, kong pơlê ki ê ƀă pêi cheăng ai pơkâ hâi khế a kong têa ê. 12 tíu cheăng, khu tê mơdró veăng rah xo tơdrêng a Hâi pêi cheăng pơrá loi tơngah, tơdroăng tê mơdró châ tơƀrê, ai troăng hơlâ mơhá liăn khế ƀă mơhá tơ’nôm hên ăm mơngế pêi cheăng.

Tung hâi cheăng pêi kong pơlê Kon Tum hơnăm 2023, mâu tíu cheăng, khu tê mơdró kal vâ rah xo mơngế pêi cheăng hiăng tơdah, tơbleăng, hnê mơhno cheăng pêi ăm dâng 700 ngế pêi cheăng, sinh viên ƀă đoân viên droh rơtăm. Kong pơlê Kon Tum châ pơkâ pêi tung hơnăm 2023 tăng cheăng pêi ăm lối 6.000 ngế pêi cheăng, tung mê ai 100 ngế pêi cheăng lăm pêi cheăng a kong têa ê.