Xua tơdjâk dêi khía rôh má 6 plong mot, sap kơxê hâi lơ 26/10, tung kong pơlê Kon Tum ai kong mêi krâ kơvâ ƀă, kong mêi kân tung lâp lu, tung mê ai tơring Đăk Glei têa mêi hên má môi ing 80-120mm. Mâu tơring Ia HDrai, Kon Plông, Đăk Tô, Kon Rẫy, Ngọc Hồi, Sa Thầy ƀă pơlê kong kơdrâm Kon Tum kong mêi hên sap ing 50-81mm.

Tơbleăng pêi pro tơdroăng hbrâ ví khía rôh má 6 plong mot, Vi ƀan kuăn pơlê kong pơlê Kon Tum hnê mơhno 10 tơring  pơlê kong kơdrâm cho 3 tơring peăng Mâ hâi lo, Mâ hâi lo ‘na Kơnhŏng dêi kong pơlê, mê cho Đăk Glei, Tu Mrông ƀă Kon Plông pêi pro kơtăng tơdroăng hnê mơhno dêi Chin phuh, Khu xiâm kơvâ cheăng ƀă dêi kong pơlê ‘na tơdroăng mơdêk hnoăng cheăng hbrâ ví xía vâ kong prâi pro ôh tá tơniăn.

Pơtối tí tăng ngăn nhên tơdroăng vâ ‘nâi ‘na kong mêi têa lân lu, pêi pro tiô troăng rơhlâ “4 tơdroăng amê”, hbrâ ví, tơleăng mơnhên, tơkâ luâ xơpá xua kong prâi pro ôh tá tơniăn, tí tăng troăng tŏng xo, tơbleăng  mâu troăng kring vế, tơniăn  lĕm ‘na mơngế, tơmeăm khoăng dêi kuăn pơlê, kring vế tơniăn ƀă kơpong lăm ối tíu ê dêi kuăn pơlê.