A 12 tíu tơ’noăng mơgêi râ má pái dêi kong pơlê Kon Tum đi đo gâk pêi cheăng khu pleăng hnoăng cheăng ƀă hiăng tŏng kum châ tơƀrê ăm hok. Tiô riân dêi Khu pơkuâ Đoân Droh rơtăm Kon Tum ăm hlo, tung hâi tơ’noăng apoăng, mâu khu ki pleăng hnoăng cheăng kum rơnó tơ’noăng a 12 tíu tơ’noăng mơgêi râ má pái phôh thong dêi kong pơlê hiăng tŏng kum hok tro lối 1.500 roh rơxế hon đa pơto tê kơtê; xing xoăng 7.000 kung kếo têa ôu; lối 300 kơhôp têa tôu ro, kơƀăn ngeăm; hrĭng loăng chêh, kế ki xut... ăm hok tro.

Rơtế amê mâu khu pleăng hnoăng cheăng a mâu tíu tơ’noăng tung kong pơlê xuân hiăng tŏng kum tơdrêng hok tro mâu tơdroăng ki trâm, môi tiah koi hiât lôi, piu lôi mơ-éa tơ’noăng a hngêi. Rơtế ƀă tơdroăng pleăng hnoăng cheăng tŏng kum châ tơƀrê ăm hok tro tơ’noăng mơgêi râ má pái phôh thong a mâu tíu tơ’noăng, hrĭng ngế hok tro a kong pơlê Kon Tum xuân châ khu râ kăn pơkuâ, Đoân Droh rơtăm ƀă hngêi trung tŏng kum tíu kâ, tíu ối tê kơtê tung mâu hâi tơkŭm po hneăng tơ’noăng.