Kơxo hâi lơ 20/4, a pơlê kong kơdrâm Kon Tum, Khu kăn Đảng kong pơlê Kon Tum tơkŭm po hneăng Hôp mơgêi 10 hơnăm pêi pro tiô Pơkâ xiâm tơnêi têa má 8 hneăng 11 ‘na tơdroăng kring vế tơnêi têa tung tơdroăng nếo nôkố. Đại tướng Tô Lâm, Ngế cheăng tung Khu xiâm Kal kí, Ngế xiâm pơkuâ Kŏng an, veăng hôp ƀă tối tơbleăng hnê mơhno a Hneăng hôp, tơmâng xo, tối mâu tơdroăng khu kăn Đảng kong pơlê Kon Tum hiăng pêi pro kơ’nâi 10 hơnăm pêi tiô Pơkâ Xiâm tơnêi têa ‘na kring vế pơlê pơla tíu tơkăng kong tơnêi têa tung tơdroăng nếo nôkố.

Tối tơdroăng pơkâ pêi, troăng rơhlâ vâ kring vế tơnêi têa dêi Khu kăn Đảng kong pơlê Kon Tum tung tơdroăng nếo nôkố, Đại tướng Tô Lâm, tối nhên: Kal thế tơkŭm hnê mơhno ƀă hnê pơ’lêh rơdêi tung tơdroăng tơkŭm pêi mâu troăng hlâ dêi Đảng vâ kring vế tơnêi têa, tơniăn kring gak tơkăng kong. 

Pơtối ‘mâi mơnhông tơrŭm môi tuăn tâi tâng hdroâng mơngế tâi tâng mâu kuăn ngo ƀă pơtối rak vế ƀă mơnhông túa lĕm tro a pơlê xiâm krá tơniăn ăm tơnêi têa tung tơdroăng nếo nôkố.