VOV4.XơĐăng - Ƀă tơdroăng châ tơƀrê lối 10 hâi séa ngăn, mơnhên ƀă rup mâu ngế tung roh tơdroăng pro xôi “Pro xôi pơkâ ‘na kếo, gak ngăn kong ƀă loăng pơlái kong kế’’, Kŏng an tơring Sa Thầy châ kheăn kơdeăn ôh tá tối hdrối. Kơxo kố, lơ 20/9/2022 a tíu pêi cheăng Kŏng an tơring Sa Thầy, pôa Dương Văn Trang, Kăn cheăng tung Tíu xiâm Đảng, Kăn pơkuâ hnê ngăn Đảng, Kăn hnê ngăn Hô̆i đong kong pơlê Kon Tum hiăng kheăn kơdeăn ôh tá tối hdrối 20 rơtuh liăn ăm khu pú hên Kŏng an tơring Sa Thầy.

Tơdah hô sơ săm tối ing Tíu xiâm gak ngăn loăng kong tơring, tung lối 10 hâi pơla kố nah, Kŏng an tơring Sa Thầy hiăng séa ngăn, mơnhên ƀă rup châ mâu ngế tung roh pro xôi “Pro xôi pơkâ ‘na kếo loăng, gak ngăn kong ƀă loăng pơlái kong kế’’ a kơpong 6, xá 692, kơpong cheăm Mô Rai, tơring Sa Thầy, ối tung kơpong kong xua Kŏng ti pêi cheăng tiô rơnó môi khu gâk ngăn kong Sa Thầy pơkuâ.

Pôa Dương Văn Trang rơkâu mâu tơdroăng châ tơƀrê tơleăng tơdroăng pro xôi dêi mâu ngế pêi cheăng Kŏng an tơring Sa Thầy

Nôkố Kŏng an tơring Sa Thầy dế pơtối mơhnhôk mâu ngế tối tơdroăng vâ pro hô sơ, kêi đeăng tâi tâng roh tơdroăng. Kăn pơkuâ hnê ngăn cheăng Đảng kong pơlê Kon Tum xuân pơkâ thế Khu kăn ƀô̆, đảng viên, Viƀan kong pơlê, Đảng ủy Kŏng an kong pơlê, Khu pơkuâ tơdroăng cheăng Đảng tơring Sa Thầy pơtối mơnhông hiâm mơno pôu râng, thăm pơkuâ, gak ngăn kong tung kong pơlê; mơdêk hnoăng dêi khu pơkuâ kong; đi đo séa ngăn, ti tăng rup, teăm tơdrêng châ hlo, pơxâu phâk tiô pơkâ dêi luât ƀă mâu tơdroăng pro xôi luât gak ngăn kong ƀă hía hé.

A Sa Ly tơplôu ƀă tơbleăng