VOV4.Xơ Đăng - Ƀă tơdroăng hlối rơtế ƀă khu mơdró rơkê, mâu khu mơdró, Vi ƀan kong pơlê Kon Tum nếo tơkŭm po Hôp tơpui tơno ƀă Khu mơdró. Lối 10 tơdroăng veăng hnê tối a rôh hôp tơdrêng ƀă 32 tơdroăng  veăng hnê tối chêh ƀă hlá mơ-éa pơtroh ăm khu kăn hnê ngăn Vi ƀan kong pơlê Kon Tum a mâu rôh tơpui tơno ăm hlo, khu tơdroăng ki mâu khu mơdró dế pêi pro, tê mơdró a Kon Tum trâm pá cho tơdroăng ki hrá ki kĭ hlá mơ-eá pơkâ rơtế ƀă mâu tơdroăng ki tơvâ tơvân tơdjâk troh tơnêi tơníu.

Pôa Nguyễn Ngọc Sâm, Kăn phŏ hnê ngăn Vi ƀan kong pơlê Kon Tum tiâ khu mơdró tơdroăng tơdjâ ‘na pơkâ xúa tơnêi

Pakĭng mê, mâu tơdroăng tơvâ tơvân ki nếo ai tung pơla séa ngăn, ăm mung kong vâ pêt nhâ pơkeăng ƀă mơdêk ôm hyô ngăn nhâ loăng kuăn kiâ pro mâu tơdroăng tơkêa bro chiâng trâm pá, hrá tung pêi pro. Khu mơdró hơnăm ối nếo kong pơlê Kon Tum xuân tối 11 tơdroăng pâ thế ƀă Vi ƀan kong pơlê Kon Tum.

Tung mê, pêi ahdrối cho tah ki xơpá ăm khu mơdró cho liăn vâ ’mâi mơnhông pêi cheăng, pêi pro tơmeăm. Pakĭng mê hlối veăng kơjo kum, pro tơ’lêi hlâu vâ khu mơdró tơ’lêi tung tơdroăng xo tơnêi vâ ’no liăn mơnhông pêi pêt tơmeăm pêlo vâ tê mơdró.

Tơmâng xo mâu tơdroăng pâ thế, hlối pâ thế dêi mâu khu mơdró, khu ‘no liăn cheăng, mâu kăn kong pơlê Kon Tum pơkâ thế mâu tíu pêi cheăng rah tăng tơdroăng pâ thế ki lâi tro, tơdroăng pâ thế dêi kuăn pơlê khu mơdró vâ tí tăng ‘nâi plĕng pơkâ luât, luât tŏng kum cho ki khu râ kơpêng pêi, tơkŭm tâi tâng, pơtroh ăm Tíu xiâm tơnêi têa mâu tơdroăng ki khu mơdró pâ thế, tơdroăng khu mơdró pâ thế kum khu mơdró tơkâ luâ xơpá, ‘mâi mơnhông pêi cheăng mơjiâng tơmeăm pê lo, tê mơdró, vâ pêi tro tiô pơkâ mơnhông mơdêk krá tơniăn.

Gương tơplôu ƀă tơbleăng