VOV4.Xơ Đăng - Kơxê lơ 10/10, a pơlê kong kơdrâm Kon Tum, Khu pơtâng tối tơdroăng kal ing troăng hyôh um tơvi, rơ’jíu, Internet kong pơlê Kon Tum tơkŭm po tơpui tơno, trâm mâ tơbâ 70 hơnăm hâi mơjiâng kơvâ chêh, in ƀă mơ’no hlá mơ-éa Việt Nam (10/10/1952- 10/10/2022). Nôkố dâng 100 tíu kichêh, in ƀă mơ’no, hngêi ki tê hlá mơ-éa rak tơniăn kum tŭm mâu hlá mơ-éa, hlá tơbeăng, hlá mơ-éa ki kal kum ăm tơdroăng ki hriâm ƀă pơchuât dêi kuăn pơlê.

Kon Tum: Tơpui tơno, trâm mâ tơbâ 70 hơnăm hâi mơjiâng kơvâ chêh, in ƀă mơ’no hlá mơ-éa Việt Nam

Kong pơlê Kon Tum xuân hiăng pơkâ tơdroăng ki chêh mơ’no kơvâ hlá tơbeăng, chêh, in ƀă mơ’no hlá mơ-éa troh hơnăm 2025, troăng ngăn troh hơnăm 2030. A rôh tơpui tơno, trâm mâ kăn teăng mâ dêi mâu tíu pêi cheăng ki chêh mơ’no hlá mơ-éa, in ƀă tê dêi kong pơlê Kon Tum hiăng ai hên rơkong tơpui tối kơhnâ, hâk vâ pơkâ mơ’no troăng hơlâ vâ rak tơniăn lĕm pơla hnoăng cheăng kal kí ƀă ki pơxúa ‘na tê mơdró; mơhnhôk, mơnhông mơhno túa lĕm tro ‘na pơchuât tung pơlê pơla.

VOV Tây Nguyên/Tơplôu: Katarina Nga