Kơxê hâi lơ 21/10, Kŏng an kong pơlê Dak Lak tơkŭm po Hneăng hôp mơgêi mâu tơdroăng leh tơbâ 60 hơnăm Hâi mơjiâng khu Kán sát kuăn pơlê. Tung pơla kố nah, Kŏng an kong pơlê Dak Lak hiăng tơrŭm ƀă Khu pơkuâ văn hok ngê̆ thuât Dak Lak tơkŭm po ăm kăn ƀô̆ mâu lêng ƀă kuăn pơlê môi tuăn pêi pro, veăng mâu roh tơ’noăng xua Khu xiâm pơkuâ Kŏng an mơhnhôk pêi pro. Tung mê, ai 4 roh tơ’noăng kân mê cho: Roh tơ’noăng chêh ti tăng plĕng 60 hơnăm Hâi mơjiâng khu kan sát kuăn pơlê; roh tơ’noăng chêh ‘na tơdroăng mơngế lêng Kan sát kuăn pơlê, roh tơ’noăng um ngê̆ thuât ƀă video clip ƀă dó inâi ‘’Mâu lêng djâ hnoăng cheăng gâk kring tơdroăng rêh ối tơniăn lĕm’’ ƀă roh tơ’noăng Kăn teăng mâ khôi túa pơchuât tung Kŏng an Kuăn pơlê.

Kheăn kơdeăn mâu ngế krê châ kâ pri mâu roh tơ’noăng

Roh kố, Vi ƀan  kong pơlê Dak lak hiăng diâp ƀâng kheăn kơdeăn ăm 25 khu pú hên ƀă ngế krê ai hên tơdroăng châ tơƀrê tung tơbleăng, tơkŭm po Hneăng tơ’noăng pơkâ luât, pĕng hnêa, tơchok. Khu xiâm pơkuâ Kŏng an diâp ƀâng kheăn kơdeăn mâu ngế krê ai hên tơdroăng châ tơƀrê tung tơdroăng tơkŭm po Roh tơ’noăng um ngê̆ thuât ƀă video clip ƀă dó inâi Mâu ngế lêng djâ hnoăng gâk kring tơdroăng rêh ối tơniăn lĕm.