Drêng troh tơbâ 98 hơnăm hâi Chêh hlá tơbeăng Kăch măng Việt Nam (21/6/1925 - 21/6/2023), kơxo hâi lơ (20/6), Kŏng an kong pơlê Dak Lak tơkŭm po trâm mâ mâu kăn teă mâ mâu kơ koan Thong tâ̆n chêh hlá tơbeăng ki pêi cheăng tung kong pơlê. Akố, Kăn xiâm Kŏng an kong pơlê Dak Lak ăm ‘nâi hiăng châ rup 74 ngế ki ai xôi tung rôh lăm plâ tíu pêi cheăng Vi ƀan 2 to cheăm dêi tơring Cư Kuin kố nah. A rôh trâm mâ, Thiê̆u tươ̆ng Lê Vinh Quy- Ngế xiâm pơkuâ Kŏng an kong pơlê Dak Lak tối, klêi ai tơdroăng vâi lăm plâ tíu pêi cheăng Vi ƀan 2 to cheăm Ea Tiêu ƀă Ea Ktur dêi tơring Čư̆ Kuin kơmăng hâi lơ 11/6 , pro 2 ngế kăn ƀô̆ cheăm, 4 ngế kŏng an cheăm hlâ ƀă 2 kŏng an tro rong, 3 ngế hlâ.

Troh nôkố kơ koan hiăng châ rup 74 ngế ki ai xôi tơdjâk troh. Nôkố tơdroăng séa ngăn tăng rup xuân ối  lăm tăng. Kong an kong pơlê xuân dế tơrŭm ƀă mâu khu râ kring tơniăn a pơlê cheăm, mơdêk hnê tối ăm mâu khu râ kuăn pơlê tối ăm kuăn pơlê hmiân tuăn, tơniăn tung rêh ối, pêi cheăng kâ.