75 hơnăm hdrối nah, khu râ Kŏng an kuăn pơlê hâk tơngăm ƀă hâk mơnê xua châ tơdah xo 6 tơdroăng ki Pôa Hồ Chí Minh, Kăn xiâm hnê ngăn tơnêi têa hneăng hdrối hiăng hnê ‘na ‘’Hnoăng cheăng dêi mơngế Kŏng an kăch măng’’. Kố châ ngăn cho mâu tơdroăng ki djâ troăng ki krih kơnía, tŭm têk dêi Pôa Hồ Chí Minh ’na hiâm tuăn, mơno, hnoăng cheăng, túa pêi, ivá cheăng, túa cheăng, ki rơkê kal athế ai dêi mơngế kŏng an kăch măng Việt Nam.

Tơkâ luâ ‘nâi to lâi rơxông, tơ lâi chal, maluâ tung hneăng ki lo lăm tơplâ pro tơleăng lĕm hdroâng mơngế, pro tơnêi têa tơrŭm chiâng môi a rơxông ki mê nah, lơ a chal hơ’lêh nếo nôkố, mơjiâng, mơnhông tơnêi têa ƀă kring vế Tơnêi têa hâi kố, mê khu râ Kŏng an kuăn pơlê đi đo tơmâng ngăn nhên khât, kơdo mơ-eăm hriâm tâp ñă pêi pro lĕm tro tiô rơkong hnê tối dêi Pôa Hồ Chí Minh ki kơnía git.

Ngế chêh hlá tơbeăng Nhị Lê - Kăn phŏ rah chêh hlá tơbeăng Tạp chí Cộng sản tối tiah kố:

‘’6 tơdroăng ki Pôa Hồ Chí Minh, Kăn xiâm hnê ngăn tơnêi têa hneăng hdrối hiăng hnê Kŏng an kuăn pơlê pin bu ai 51 ‘noăng chư, la amê mơhno tối tơdroăng ki séa mơnhên ngăn nhên dêi Pôa Hồ Chí Minh ƀă khu râ kŏng an pin; mơhno tối tơdroăng loi tơngah ki păng ‘nâng kơ khu râ ŏng an pin ƀă xuân cho môi tung 2 kơpeăng kŏng rơtế ƀă khu mô đô̆i kring vế rak ngăn Đảng, rak ngăn Chin phuh, gak ngăn kuăn pơlê.

Amê pin hlo tuăn mơno dêi Pôa hiăng chiâng troăng chông djâ ki tơtro má môi, hiăng chiâng ki xiâm vâ mơhnhôk khu râ kŏng an kuăn pơlê pin chôa ‘lâng rế hía rế mơdêk tung hneăng kăch măng kring vế ƀă mơjiâng tơnêi têa xah hô̆i chuh ngiah’’.

Yăo sư-Tiê̆n sih Hoàng Chí Bảo, Ngế ki hriăn plĕng, cho Chuyên gia cao cấp, Ngế cheăng tung Hội đồng lý luận Trung ương tối tiah kố, tơnêi têa pin dế mot tung hneăng ki thăm mơdêk tŭm têk, tâi tâng ƀă tơdrêng hnoăng cheăng hơ’lêh nếo, pêi cheăng kơmăi kơmok, pêi cheăng tiô túa nếo, hbrâ pêi pro kơhnâ khât tung tơdroăng tơrŭm ƀă lâp plâi tơnêi trâu rơdâ, tung pơla ai tơdroăng lâp plâi tơnêi, kơpong xuân u ối hên ki tơvâ tơvân, ing mê, tơdjâk troh tơdroăng kring vế, gak ngăn.

Vâ pêi pro hnoăng cheăng kring vế, gak ngăn Đảng, kring vế khu kăn pơkuâ, gak ngăn kuăn pơlê, kring vế tơniăn tơdroăng rêh ối dêi tơnêi têa ƀă tơdroăng kring vế rak tơniăn pơlê pơla, pakĭng tơdroăng veăng mơjiâng khu râ kŏng an kuăn pơlê ki păng ‘nâng, ki ó rơdêi, ki tơtro khât, mê tơdroăng ki mơhno tối ƀă rak vế 6 tơdroăng Pôa Hồ hiăng hnê Kŏng an kuăn pơlê cho tơdroăng ki kal ƀă kân tơdrêng ‘nâng:

‘’6 tơdroăng ki Pôa Hồ hnê cho mơhno tối ‘na tuăn hiâm, mơno, tung mê ai tá tơdroăng kal kí, ai tá mơhno túa lĕm tro. Ki trâu rơdâ luâ tâ kơ mê, cho túa lĕm tro tung tơpui kâ, mơhno túa lĕm tro tung pêi cheăng, túa lĕm tro, tơdrăng ki Pôa Hồ tối cho kal athế kơhnâ, kơĭng, tơdrăng, tơpâ păng ‘nâng. Nôkố tâi tâng pin pơrá kal athế hriâm pơtâp túa lĕm tro ki tơdrăng, krúa lĕm, păng ‘nâng vâ tơxâng châ kuăn pơlê loi tơngah.

Mơhúa dêi 6 tơdroăng Pôa hiăng hnê mê, cho tơdroăng drêng trâm kuăn pơlê athế koh nhoăm, athế ai phep ƀă kuăn pơlê. Xua ga, kŏng an cho pú hmâ môi tiah Pôa Hồ hiăng hnê, tơdroăng ki ai phep, koh nhoăm kuăn pơlê ti xê to mơhno to a ngiâ mê cho tơdroăng ki pêi pro vâ kuăn pơlê loi, kuăn pơlê pâ, kuăn pơlê tŏng kum, kuăn pơlê kring vế mê ga nếo xêt khât’’.

Vâ pơtối thăm mơdêk luâ tâ kơ mê nếo, tơdroăng hriâm tâp, rak vế 6 tơdroăng Pôa Hồ hnê, khu râ Kŏng an kuăn pơlê, mê pôa Nguyễn Phú Trọng, Kăn xiâm pơkuâ hnê ngăn hiăng tối nhên kal athế pêi pro tŭm tung tâi tâng khu râ Kŏng an kuăn pơlê tung lâp tơnêi têa tung hnê mơhno, tơkŭm pêi pro lĕm tro 3 tơdroăng ki xiâm, mê cho ‘’hriâm tâp’’; ‘’khŏm mơ-eăm rak vế, pêi pro bối’’, ƀă ‘’djâ troăng, prôk ahdrối’’.

Thăm mơdêk tơdroăng hriâm tâp, pêi pro 6 tơdroăng ki Pôa Hồ hnê mê athế cho tơdroăng pêi pro đi đo, rêm hâi; ing mê ah, ga kô chiâng túa rêh, túa tơmiât, túa pêi pro dêi tơrêm ngế kăn ƀô̆, rêm ngế lêng Kŏng an kuăn pơlê.

Pôa Nguyễn Phú Trọng ai pơkâ thế tiah kố:

“Rêm ngế kăn ƀô̆, lêng Kŏng an kuăn pơlê athế đi đo ‘’tí tăng séa mơnhên ngăn dêi tơdroăng rêh, túa cheăng tơná’’ vâ ing mê ‘mâi rơnêu, ‘mâi hơ’lêh, pơtối mơhriâm, pơtâp đi đo athế hlê plĕng trâu, nhên, athế kơdo mơ-eăm vâ rak vế, pêi pro 6 tơdroăng ki Pôa Hồ hnê, ki rơhêng vâ tối cho rơkong ki uăn pât ‘’ƀă dêi tơná athế ‘nâi kơhnâ, kơdĭng, môi tuăn, tơdrăng khât’’, xua ga kố cho tuăn mơno tung pêi cheăng, cho tơdroăng ki rêh ối tung rêm tơdroăng cheăng ngế ki lâi xuân athế trâm rêm hâi.

6 tơdroăng ki Pôa Hồ hnê Kŏng an kuăn pơlê cho rơkong hnê tối ƀă khu lêng ki păng ‘nâng, môi hnoăng cheăng ki krê xêh la kal khât ai tơdjâk troh pơlê pơla ki kân rơdâ, ngế ki lâi xuân athế dêi tơná séa mơnhên dêi túa rêh ối, pêi cheăng vâ uăn pât, ‘mâi rơnêu, hơ’lêh tiô tơdroăng ki lĕm tro’’.

Plâ 75 hơnăm hdrối mê hía nah, 6 tơdroăng ki Pôa Hồ mơjo pâ hnê ‘na ‘’Túa cheăng, hiâm tuăn dêi kŏng an kăch mê̆nh’’ xuân ối kơnía xêh tiah mê troh nôkố, maluâ tung pơla chal nếo nôkố, drêng tâi tâng Đảng, tâi tâng kuăn pơlê ƀă tâi tâng khu lêng pin dế pêi pro kơhnâ khât, trâu rơdâ tiô Tơdroăng pơkâ dêi Hneăng hôp kân tơnêi têa má 4, hneăng 8 ‘na mơjiâng, ‘mâi rơnêu pât hnoăng cheăng Đảng; hriâm tâp ƀă pêi pro tiô tuăn mơno, hiâm tơmiât, túa pêi cheăng dêi Hồ Chí Minh.

Pơtối mơdêk hnoăng cheăng Khên tơnôu ki ó rơdêi, khu râ Kŏng an kuăn pơlê pơtối hriâm tâp, hnê mơhno trâu rơdâ, kơhnâ khât 6 tơdroăng Pôa Hồ hnê Kŏng an kuăn pơlê, ‘mâi rơnêu pât, rak vế tơniăn hnoăng cheăng kal kí, túa cheăng dêi kăch măng, mơjiâng um méa ki lĕm tro ‘na mơngế Kŏng an kăch măng ‘’Xua tơnêi têa piu dêi châ-Xua kuăn pơlê vâ tŏng kum’’.