VOV4.Xơ Đăng - A kong pơlê Kon Tum sap ing 23 chôu kong măng lơ 27/9 pơxiâm ai kong mêi kân. Troh a kơxo má lơ 28/9 xuân ối ai mê, khía rế têi ƀă tơdjâk dêi khía mơhot kân rôh má 4 hiăng pro tơ’nhiê mâu kế tơmeăm.

Tơdroăng tơbleăng sap ing Vi ƀan hnê ngăn tơring Kon Plông, kong pơlê Kon Tum, tơkoh ƀă kong pơlê Quảng Ngãi, xua tơdjâk dêi kong mê khía mơhot, nôkố 5 to cheăm dêi tơring kố, mê cho Đăk Nên, Măng Bút, Đăk Ring, Đăk Tăng ƀă Pờ Ê hiăng tro pâ on tơhrik.

Mâu tơring Tu Mrông, Kon Plông, Đăk Glei ƀă hên tơring ki ê hiăng ai mâu toăng hngêi ki tro tơtêa kuâ; tơhnah tơhnâp, tro têa lu a mâu troăng prôk.

Ai mâ tíu tro tơ’nhiê kế tơmeăm xua khía mơhot kân rôh má 4 a tơring Tu Mrông

Vâ rak tơniăn châ chăn ƀă kế tơmeăm kuăn pơlê, sap ing kơxê ƀă kong măng hnah, mâu tơring tung kong pơlê hiăng tơkŭm ‘mâi xĕn dâng 600 rơpŏng kuăn pơlê ƀă lối 2.500 pơ’leăng mâ mơngế lo ing kơpong thông, kơpong ki mơni tơ’lêi tro tơhnah troh ối a tíu tơniăn.

Khoa Điềm/VOV Tây Nguyên/Tơplôu: Katarina Nga