Tơdroăng kố hiăng châ mơ’no tối a roh hôp tối tơbleăng dêi Hneăng hôp kân mâu hdroâng kuăn ngo ki iâ mơngế a kong pơlê Dak Lak roh má 4, hơnăm 2024 po a kơxê lơ 18/10. Hneăng hôp kân mâu hdroâng kuăn ngo ki iâ mơngế kong pơlê Dak Lak roh má 4, hơnăm 2024 kô po tung 2 hâi, lơ 24 troh lơ 25/10 la ngiâ kố ah a pơlê kong kơdrâm Ƀuôn Ma Thuột, ƀă dó inâi “Kuăn pơlê mâu hdroâng kuăn ngo kong pơlê Dak Lak tơrŭm, pơhlêh, rơkê plĕng, pơtối mơdêk hnoăng cheăng, ‘na ki ai xêh hlâu, tơrŭm ƀă mơnhông krá tơniăn”.

Tiô tối ăm ‘nâi, ai lôí 300 ngế kăn ki veăng, tung mê, ai 250 ngế kăn teăng mâ ki păng’nâng, teăng mâ ăm lối 715 rơpâu ngế kuăn pơlê ki iâ mơngế ôí tung 49 hdroâng kuăn ngo nôkố dế rêh ối, hriâm tâp ƀă pêi cheăng a kong pơlê Dak Lak.