Tiô jâ Nguyễn Thụy Phương Hiếu, Kăn phŏ pơkuâ mơhno khôi túa lĕm tro – Tơ’noăng ivá ƀă Ôm hyô Dak Lak, kố cho tơdroăng tung tơdroăng tơpui kâ ƀă kong têa ê mơhno khôi túa lĕm tro dêi kong pơlê Dak Lak hơnăm 2022. Roh lăm pôu pêi cheăng klăng leh tơbâ 60 hơnăm mơjiâng tơrŭm cheăng tơpui kâ Việt Nam – Lếo, 45 hơnăm tơrŭm cheăng Việt Nam – Lếo ƀă châ tơkŭm po tro roh leh tơbâ 47 hơnăm hâi mơjiâng tơnêi têa Lếo hâi lơ 2/12.

Tung roh lăm pôu pêi cheăng, 2 pâ hiăng tơpui tơno ‘na tơrŭm mơnhông mơdêk khôi túa lĕm tro ƀă ôm hyô. Môi tuăn kĭ tơkêa mơ-éa chô vế pơla 2 kơ koan pêi cheăng dêi 2 kong pơlê ‘na tơdroăng tơrŭm cheăng, tŏng kum dêi pó tung tơdroăng tơrŭm pơla khôi túa lĕm tro ƀă ôm hyô tung hneăng sap ing kố troh hơnăm 2025.

Tiô tơdroăng xiâm kĭ tơkêa, 2 pâ kô pơ’lêh dêi pó pêi pro tơdroăng tơpui kâ ƀă kong têa ê ‘na khôi túa lĕm, djâ khu ngê̆ thuât râ kong pơlê troh kong pơlê pú hmâ vâ mơđah tơbleăng xuân môi tiah pêi pro séa ngăn tơdjêp ôm hyô pơla khu tê mơdró ƀă mâu kơpong ôm hyô a rêm kong pơlê. Tơdrêng amê, djâ khôi túa lĕm tro ki má môi dêi rêm kong pơlê troh kong pơlê pú hmâ vâ trâm mâ tơpui tơno, mơđah tơbleăng.