VOV4.Xơ Đăng - Tung 2 hâi lơ 21 ƀă lơ 22/9, Đoân Droh rơtăm Kŏng san Hồ Chí Minh kong pơlê Dak Nông hiăng po Hneăng hôp rôh má 4, pơla hơnăm 2022 -2027, ƀă tơdroăng veăng dêi 200 ngế kăn teăng mâ ăm lối 157 rơpâu ngế đoân viên droh rơtăm tung lâp kong pơlê. Kố cho kong pơlê ki apoăng a kơpong Tây Nguyên po hneăng hôp Đoân droh rơtăm. Tiô tơbleăng a Hneăng hôp hneăng hơnăm kố nah, Đoân Droh rơtăm Dak Nông hiăng pêi châ ƀă tơkâ luâ 11/12 tơdroăng pơkâ.

Ki xiâm cho tung tơdroăng veăng pro thôn pơlê nếo, rêm râ Đoân hiăng pêi pro vâ chê 7 rơpâu to kế tơmeăm, xoăng cheăng ăm droh rơtăm ƀă tâi tâng kơnâ lối 38,34 rơtal liăn. Droh rơtăm lâp kong pơlê hiăng po lối rơpâu rôh hnê tối ƀă lo lăm pêi cheăng rak vế kong prâi tơnêi tơníu, gô̆m văng mâu xok hvât hmâng vâ, pêt nếo lối 700 rơpâu xiâm loăng tŭm túa; pro, ‘mâi rơnêu 127 tíu hôp, xah hêi ăm mâu phô̆m vâ xông kân, pêi pro hên hĭn tơdroăng kum mâu phô̆m vâ xông kân ki xơpá ƀă tâi tâng kơxô̆ liăn lối 15 rơtal liăn.

Droh rơtăm kong pơlê Dak Nông hiăng mơ’no 12 khu, 8 tơdroăng tơkêa, tơdroăng ki kal pla hơnăm 2022 – 2027

Ƀă tơdroăng pêi pro: “Hơnăm ối nếo Dak Nông djâ troăng ahdrối, rơhêng vâ, tơmiât rơkê, mơnhông”, Hneăng hôp kân Đoân droh rơtăm kŏng san Hồ Chí Minh kong pơlê Dak Nông rôh má 4, pơla hơnăm 2022 – 2027 hiăng pơkâ mơ’no 12 khu pơkâ, 8 tơdroăng ki chêh tung hlá mơ-éa, tơdroăng ki kal ƀă khŏm mơ-eăm pro tơdroăng ki rơhêng vâ chiâng mâu tơdroăng pêi ki pro pơxúa tơƀrê.

Ki rơhêng vâ tối cho mâu tơdroăng pơkâ: rêm hơnăm pêt nếo 250 rơpâu xiâm loăng; kum 10 thôn, pơlê xơpá pêi klêi tơdroăng pơkâ thôn pơlê nếo; kum 200 rơtal liăn ăm droh rơtăm mung liăn vâ pêi cheăng; rêm hơnăm kơdroh lối 6% rơpŏng kơtiê droh rơtăm hdroâng kuăn ngo.

Katarina Nga tơplôu ƀă tơbleăng