Tơbleăng a leh Kĭ tơhrâ tung hlá mơ-éa chôu vế tơrŭm cheăng pơla péa kong pơlê, pôa Dương Văn Trang, Ngế cheăng tung tíu xiâm Đảng, kăn hnê ngăn Đảng ủy kong pơlê, Kăn hnê ngăn Hô̆i đong kong pơlê Kon Tum ƀă pôa Xay-nhạ-phon, Ngế cheăng tung Tíu xiâm Đảng Nhân yân Kăch măng Lếo, Kăn hnê ngăn Đảng ủy kong pơlê, Kăn hnê ngăn kong pơlê Attapeu khĕn kơdeăn mâu hnoăng cheăng hiăng châ pêi pro ‘na tơrŭm cheăng pơla péa kong pơlê tung hơnăm hdrối mê hía nah, hlối tối pơtối mơdêk tâ nếo, mơdêk tơrŭm cheăng tung tŭm kơvâ cheăng, tơrŭm môi tuăn malối pơla kong pơlê Kon Tum ƀă kong pơlê Attapeu.

Rơtâ tá hâi pêi cheăng

Ing tơdroăng hlê plĕng dêi rơpó, loi nhoăm dêi rơpó, ing tơdroăng châ pêi tơƀrê xuân môi tiah hlo nhên ki xơpá, pơloăng mơnúa, Vi ƀan kong pơlê Kon Tum ƀă mâu kăn kong pơlê Attapeu, kong têa Lếo hiăng kĭ tung hlá mơ-éa chôu vế ‘na tơrŭm cheăng pơla hơnăm 2022-2027 ƀă mâu tơdroăng pơkâ mơnhông tơrêm tơdroăng cheăng: Kal kí, tơpui tơno; cheăng lêng kring tơniăn; cheăng kâ; Hnê hriâm ƀă hnê mơjiâng tuăn ngôa rơkê ƀă mơdêk mơngế rế hên ngế rơkê cheăng.