Kơxo lơ 3/11, a pơlê kong kơdrâm Kon Tum, Khu râ kăn ƀô̆ pơkuâ kong pơlê Kon Tum ƀă kong pơlê Sekong, kong têa Lếo hiăng ai roh pêi cheăng vêh mơnhên tơdroăng châ tơƀrê tơrŭm cheăng tung pơla kố nah ƀă kĭ tơkêa mơ-éa chôu vế ‘na tơrŭm cheăng hneăng hơnăm 2022 – 2027. Vi ƀan kong pơlê Kon Tum ƀă Khu râ kăn pơkuâ kong pơlê Sekong hiăng kĭ tơkêa Hlá mơ-éa chôu vế ai 7 troăng ‘na tơrŭm cheăng pơla 2 kong pơlê hneăng hơnăm 2022 – 2027.

Tâi tâng roh pêi cheăng

Pơtối mê, Kon Tum ƀă Sekong kô pơtối tơrŭm krá tơniăn ‘na gâk kring, rak tơniăn pơlê pơla, mơjiâng tơkăng kong hơniâp lĕm, tơniăn, tơrŭm ƀă mơnhông mơdêk tŭm túa; ai hên mâu tơdroăng mơhnhôk mơ’no liăn cheăng tê mơdró, mơhnhôk khu mơ’no liăn cheăng dêi kong pơlê ti tăng roh tơ’lêi mơ’no liăn cheăng ƀă pêi pro 2 tơdroăng tơkêa bro a 2 kong pơlê.

Khu râ kăn pơkuâ kong pơlê Kon Tum ƀă Sekong kĭ tơkêa Hlá mơ-éa chôu vế tơrŭm cheăng hneăng hơnăm 2022 – 2027

Klêi mê, pro tơ’lêi hlâu vâ hok tro kong pơlê Sekong troh hriâm a mâu tíu hnê mơjiâng tuăn ngôa rơkê a Kon Tum tiô Tơdroăng hriâm đăi hok hneăng hơnăm 2024 – 2029 ƀă ăm kăn ƀô̆, hok tro kong pơlê Kon Tum troh hriâm a mâu hngêi trung hnê mơjiâng tuăn ngôa rơkê a kong têa Lếo tiô Tơdroăng hnê tơ’nôm iâ hâi; Pêi pro tơdroăng tơkŭm po tơdjêp tour, troăng ôm hyô vâ pêi pro mâu tơdroăng ôm hyô troăng pêi cheăng kâ peăng mâ hâi lo – peăng mâ hâi luô ƀă hía hé.