Xông tơpui a Leh kĭ tơkêa, pôa Lê Ngọc Tuấn, Kăn hnê ngăn Vi ƀan kong pơlê Kon Tum mơnhên, mơhé kong pơlê Kon Tum ƀă kong pơlê Stung Treng, kong têa Kul ôh tá ai tơdjuôm troăng tơkăng kong laga tơnêi tơníu, loăng pơlái kong kế hía hé ai hên tíu ki mơtiah dêi rơpó vâ rơtế tơrŭm mơnhông mơdêk tung mâu kơvâ cheăng ki rêm pâ rơhêng vâ ‘nâi plĕng.

Tiô tơdroăng hlê plĕng, loi tơngah dêi rơpó, Khu râ kăn râ xiâm kong pơlê Kon Tum ƀă Stung Treng, kong têa Kul hiăng mơnhên nhên tơdroăng châ tơƀrê tơrŭm cheăng châ tơƀrê tung pơla kố nah, mơhno mâu tơdroăng pá puât, tơvâ tơvân ƀă môi tuăn kĭ tơkêa Mơ-éa chôu vế tơdroăng tơrŭm cheăng.

Tung mê kơvâ cheăng kâ, tê mơdró kô tơkŭm tơrŭm cheăng mơnhông mơdêk ôm hyô, pêi chiâk deăng, tê mơdró ƀă kơmăi kơmok tê mơdró. Kơvâ mơhno khôi túa lĕm tro – Rêh ối pơlê pơla tơkŭm mơnhông hnê hriâm, khôi túa lĕm tro, tŏng kum mơngế Việt Nam a kong pơlê Stung Treng.

Kơvâ Khăm pơlât tơpui tơno túa ki rơkê tơtro hbrâ mơdât pơreăng, hnê mơjiâng mơngế pêi cheăng kơvâ ngăn pơkeăng ƀă khăm pơlât ƀă tơdroăng tơpui tơno Khu râ kăn péa pâ môi tuăn 2 hơnăm môi xôh kô pơ’lêh dêi rơpó tơkŭm po Hneăng hôp mơnhên tơdroăng châ tơƀrê mâu tơdroăng xiâm hiăng kĭ tơkêa.