A tíu pêi cheăng thôn Phan Dũng, cheăm Tuy Phong hlá mơ-éa klĕm inâi kuăn pơlê ƀă ngế ki tơbriât to pro kăn teăng mâ Kuô̆k hô̆i hneăng XVI ƀă kăn teăng mâ Hô̆i đong hnê ngăn kuăn pơlê rêm râ pơla hơnăm 2026 – 2031 đi đo ai hên kơdrâm kuăn pơlê troh pơchuât ngăn. Pôa Mang Nhu, hdroâng kuăn ngo Raglai a thôn Phan Dũng ăm ‘nâi, mâu hâi hdrối nah kăn ƀô̆ thôn pơtối troh a rêm rơpŏng hngêi kuăn pơlê vâ tối ‘na rôh tâ phĭu, pơchân kuăn pơlê tăng ‘nâi nhên rêm ngế mâu ngế ki tơbriât to pro kăn ƀă séa ngăn inâi dêi vâi, hbrâ rơnáu vâ tâ phĭu.

“Rêm ngế kuăn pơlê ai hnoăng rah xo mâu kăn ki tơná hlo vâi tơxâng, mê athế pro tiah lâi rah xo ăm tro, ‘ló mơngế. Cho kuăn pơlê bô bố xuân rơhêng vâ mâu kăn pơkuâ xo ah hmôi ki vâ kuăn pơlê pôk mê tơmâng ngăn hên tâ nếo troh tơdroăng púi rơhêng vâ dêi kuăn pơlê, tơmâng ngăn tŏng gum vâi ai tơdroăng rêh ối phâi hơtôu, hơniâp ro. Á hlo vâi krâ nhŏng o xuân tơpui tối hêng, mơhnhôk vâi muăn kuăn ‘nĕng tro 18 hơnăm ngi klêng chiâng lăm tâ phĭu”.

Pôa Mang Hiếu, pôa Phan Dũng, Kăn thôn ăm ‘nâi, thôn Phan Dũng ai hên kuăn pơlê hdroâng kuăn ngo Raglai, ối tung tíu tâ phĭu kơxô̆ 5 dêi cheăm Tuy Phong, kong pơlê Lâm Đồng. Thôn ai 663 ngế kuăn pơlê pơrá hiăng châ tối ăm ‘nâi ‘na hâi tâ phĭu.

“Vâ ăm kuăn pơlê ‘nâi nhên tâ ‘na hâi lơ 15/3 cho hâi dêi tâi tâng kuăn pơlê lăm tâ phĭu mê nôkố thôn xuân hiăng tơrŭm ƀă măt trâ̆n vâ hnê tối tung Zalo dêi khu xuân môi tiah fanpage dêi Khu ngăn kuăn pơlê pêi chiâk. Ing mê, vâ hnê tối ăm vâi krâ kuăn pơlê ‘nâi  nhên hâi ki mê ah cho hâi lăm tâ phĭu, pơtroh hiâm mơno púi rơhêng vâ dêi tơná ƀă mâu ngế ki tơbriât to pro kăn”.

A cheăm Bắc Bình, kong pơlê Lâm Đồng, cheăng hbrâ ăm hâi leh kân xuân hiăng pêi pro klêi tâi tâng. Prôk tơkâ luâ mâu thôn kuăn pơlê hdroâng kuăn ngo Chăm dêi cheăm Bắc Bình, tíu lâi xuân tâng idrâp loâ pơchuât hnê tối ‘na rôh tâ phĭu. Ôh ti xê hnê tối ing loa, mâu tôh tâ phĭu ối tơrŭm ƀă ngế ki châ kuăn pơlê loi, mâu ƀok, yah tung mâu hdroâng kuăn ngo Chăm troh rêm rơpŏng kuăn pơlê vâ mơhnhôk tơpui tối leăng ăm vâi krâ kuăn pơlê hlê nhên ki pơxúa dêi rôh tâ phĭu.

Ƀok xiâm Huỳnh Cứng, môi ngế ƀok phop mơngế Chăm a thôn Bình Tiến, cheăm Bắc Bình tối: ing cheăng hnê tối, vâi krâ kuăn pơlê Chăm hlê nhên rôh tâ phĭu ôh ti xê to tơdroăng ki pơxúa mê ối cho hnoăng dêi rêm ngế kuăn pơlê. Ing mê, tơdjâk tơdroăng ki phiu ro, loi tơngah vâ hâi tâ phĭu – hâi lơ 15/3 la ngiâ cho hâi leh kân dêi tâi tâng kuăn pơlê.

“Mâu hâi hdrối cheăm hnê tối trâu rơdâ ‘na cheăng tâ phĭu, a troăng xuan kơtúa ƀâng rôl, khâuh hiê̆u, hlá cơ tơnêi têa, vâ pêi pro hâi tâ phĭu pôk kăn. Tơná á cho môi ngế ƀok khôp phop, á xuân hnê tối ki hdrối tâ cho troh nhŏng o rơpŏng hngêi dêi tơná athế pâ troh hâi lăm tâ phĭu ƀă rah xo mâu ngế ki tuăn mơno lĕm, rơkê, tơxâng vâ xo ah hmôi drêng châ pôk xo athế pêi pro tro rơkong tơhrâ dêi tơná môi tiah hdrối nah, veăng gum ivá ăm pơlê cheăm”.

Jâ Nguyễn Thị Vân Khánh, Phŏ pơkuâ hnê ngăn Đảng, Kăn hnê ngăn Vi ƀan tâ phĭu cheăm Bắc Bình ăm ‘nâi, tung lâp cheăm ai lối 36.400 ngế kuăn pơlê. Vâ hbrâ ăm rôh tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê rêm râ pơla hơnăm 2026 – 2031, kăn pơkuâ cheăm hiăng tơbleăng rĕng tơdâng tơ’mô mâu tơdroăng cheăng ƀă ivá khŏm mơ-eăm, malối cho cheăng hnê tối.

“Cheăng hnê tối athế châ tơtrŏng, malối tung kơpong kuăn pơlê hdroâng kuăn ngo. Ƀă tiah mê, ngin kô tơrŭm cheăng hnê tối vâ tối mâu tơdroăng ki ai tơdjâk troh cheăng tâ phĭu. Tơdroăng ki hnê tối ki râ kơpêng hnê mơhno ngin xuân rak tơniăn tro tiô pơkâ tơdjuôm, pêi pro mâu tơdroăng kal ai tơdjâk troh cheăng tâ phĭu. Ƀă ngin loi hâi lơ 15/3 cho hâi leh kân dêi tâi tâng kuăn pơlê”.

Xuân môi tiah cheăm Bắc Bình, cheăm Tuy Phong nếo mơjiâng ai tơnêi tơníu kân rơdâ, kuăn pơlê rêh ối tơprâ tơprŭng, tơdroăng rêh kâ ối, trâm hên xơpá, pâ thế cheăng hbrâ rơnáu ăm rôh tâ phĭu athế châ pêi pro nhên krâu. Pôa Trần Di Hậu, Phŏ hnê ngăn Vi ƀan cheăm Tuy Phong, kong pơlê Lâm Đồng ăm ‘nâi, tâi tâng kơxô̆ ngế kuăn pơlê dêi cheăm cho 6.616 ngế/9.751 pơ’leăng mâ mơngế. A cheăm ai 2 kơpong tâ phĭu ai hên kuăn pơlê hdroâng kuăn ngo iâ mơngế cho thôn Phan Dũng ƀă thôn Tuy Tịnh 2. Troh nôkố, cheăng hnê tối châ cheăm pêi pro ƀă hên túa ki tơtro.

“Klêi kơ’nâi châ tơdah xo inâi mâu ngế ki tơbriât to pro kăn, cheăm hiăng hnê mơhno chêh pro tơdroăng ki hnê tối ‘na chêh tối ‘nâng ‘nâi dêi tơrêm ngế kăn vâ pơchuât tung loa, mê nếo tơbleăng tung trang fanpage. Ing hâi kố troh hâi tĭng a mâu kơpong ki ai hên kuăn pơlê ối môi tiah: hngêi trung hriâm, mâu kơchơ mê kô ai tơ’nôm mâu ƀảng hnê tối ƀă mâu paneau vâ ăm vâi krâ nhŏng o ‘nâi nhên tâ nếo ki kal dêi rôh tâ phĭu”.

Mâu rôh trâm mâ kuăn pơlê ƀă mâu ngế ki tơbriât vâ to pro kăn, mâu khâuh hiê̆u hnê tối ăm hâi tâ phĭu, idrâp chuât dêi loa châ pơchuât ‘no rêm hâi ƀă hên ki ê tâi tâng pơrá dế pro chiâng tơdroăng hơniâp ro hdrối hâi tâ phĭu a kơpong kuăn pơlê hdroâng kuăn ngo Chăm, Raglai.