Hâi lơ 12/6, kong pơlê Dak Lak hiăng pơtroh kơthô dêi Khu kăn Đảng kong pơlê, Hô̆i đong hnê ngăn kuăn pơlê, Vi ƀan hnê ngăn kuăn pơlê, Vi ƀan măt trâ̆n tơnêi têa Việt Nam krêo thế. Tung kơthô ai chêh, kong pơlê Dak Lak tối nhên: Kuăn pơlê mâu hdroâng kuăn ngo tung kong pơlê tơtrâ, tăm nâ tơdroăng pêi pro xôi luât dêi khu ki ‘mêi. Mâu khu râ pơkuâ cheăng dế thâ tăng rup mâu ngế ki ‘mêi ƀă dế tăng rup mâu ngế ki u ối tung khu ‘mêi vâ pơxâu phâk kơtăng tro tiô luât.

Râ Đảng, mâu kăn cheăm tơring, kong pơlê hiăng tơbleăng pêi mâu tơdroăng vâ tơniăn, teăm lăm pôu kơ-êng hơlêm, kơjo kum mâu rơpŏng ai ngế hlâ,  ai ngế tro rong; tơbleăng tối thế kuăn pơlê pôi tá préa, pôi tá xâu, pêi tro tơdroăng hnê mơhno dêi khu râ pơkuâ cheăng. Khu kăn pơkuâ hnê ngăn Đảng kong pơlê, Hô̆i đong hnê ngăn kuăn pơlê, Vi ƀan hnê ngăn kuăn pơlê, Vi ƀan Măt trâ̆n tơnêi têa Việt Nam kong pơlê tơtrâ, tăm nâ ó khât tơdroăng khu ‘mêi lăm plâ a tíu pêi cheăng dêi tơnêi têa, kơdê mơngế, khu ki mê hiăng pro xôi luât kân ‘nâng; hlối hơlêm tơdroăng tô heăng, khéa kho kơ rơpŏng ai mâu kuăn mơngế pro kŏng an, kăn ƀô̆ ƀă kuăn pơlê ki hlâ mê.

Kong pơlê Dak Lak krếo mâu kuăn pơlê, mâu lêng tung lâp kong pơlê môi tuăn dêi rơpó, loi kơ troăng rơhlâ dêi Đảng, hnoăng pơkuâ hnê mơhno dêi rêm râ Đảng ƀă tơdroăng pơkuâ dêi mâu kăn rêm râ. Veăng pêi tơdroăng mơhnhôk “Tâi tâng kuăn pơlê kring vế Tơnêi têa’’, pơtối rak vế ivá rơdêi a tơdroăng mơhnhôk “Tâi tâng kuăn pơlê kring vế Tơnêi têa”, pơtối rak vế ivá rơdêi kring gak tíu tơkăng kong, tâi tâng kuăn pơlê tơniăn môi tuăn veăng kring gak; tơrŭm , veăng kum mâu khu râ pơkuâ cheăng ; rơtế veăng kum, hlê tơdroăng châi heăng, khéa kho ƀă mâu rơpŏng hngêi kŏng an ki ai ngế hlâ ƀă kuăn pơlê ki hlâ, tro rong râ; hmiân tuăn pêi cheăng kâ, veăng ‘no hnoăng rak tơniăn, mơnhông pơlê, cheăm.

Ôh tá chiâng hmôu pơ đăng, tối tơbleăng mâu tơdroăng tơdjâk troh mê tung Facebook, Zalo... drêng hâi teăm ‘nâi nhên, tơdroăng ki mê hâi châ mơnhên, ah pro chiâng tơdjâk kân troh tơdroăng cheăng pêi dêi mâu khu râ pơkuâ cheăng ƀă chiâng pro kuăn pơlê tô tuăn; đi đo hbrâ rơnáu, “pôi tá tơmâng, pôi tá hmôu pơ rĕng loi, pôi tá tiô’’ mâu khu ‘mêi ki pro ‘mêi pơlê pơla, mâu ki kơneăm hêng hôu ki hriĕn pro tơdroăng  tí tăng tối hmâng vâ ôh tá tro, hlối djâ  pro tơ’nhiê mâu kăn pơlê cheăm, pro chiâng ai tơdroăng ôh tá tơniăn tung tơring cheăm, kong pơlê.