Klêi kơ’nâi tơdế khế sap ing Tuy Hòa lăm a Ƀuôn Ma Thuột xo pêi dêi hnoăng cheăng a Khu pơkuâ ngăn Đoàn Dak Lak, nâ Nguyễn Thị Như hiăng tơniăn ‘na tíu ối, rah xo hngêi trung hriâm ăm dêi kuăn hriâm ƀă hiăng hbrâ rơnáu klêi tâi tâng mâu tơdroăng kế tơmeăm xúa ki kal. Maluâ tơdroăng cheăng a kong pơlê ki nếo tơvâ, la châ mâu vâi pú, khu pêi cheăng tŏng gum mê nâ Như ôh tá xapá klâi.

“Ki hdrối ai hên cheăng vâ pêi, tơdroăng cheăng pêi hên tâ, tơdroăng cheăng pêi tâk tơ’nôm hên tâ. Tơdroăng cheăng pêi pa gong, pêi a mơ’nui măng tĭng mê tối tơdjuôm la ngiâ ah kô tơvâ hên. A tíu pêi cheăng hdrối nah mê ai jâ pôa tŏng gum veăng rak ngăn kuăn ‘nĕng, nôkố lăm troh pêi cheăng a tíu nếo mê on veăng má athế mơeăm xing xoăng dêi mâu tơdroăng cheăng vâ hmiên tuăn pei cheăng a tíu pêi cheăng ki nếo”.

Xuân tung tơdroăng ki lăm troh a kong pơlê ki nếo xo pêi dêi hnoăng cheăng, nâ Nguyễn Thị Thanh Huyền, pêi cheăng a Khu pơtâng tối tơdroăng kal ƀă Hnê mơhnhôk cheăng Đảng Dak Lak, tối, nâ ƀă 25 ngế kăn ƀô̆, ngế pêi cheăng nếo lăm troh kố xo pêi dêi tơdroăng cheăng châ tŏng gum tá hiâm mơno sap ing mâu vâi pú ki pêi rơtế tung môi tíu pêi cheăng.

“Sap ing kăn pơkuâ khu, kăn pơkuâ ƀơrô cheăng ƀă mâu nhŏng o pơrá gum á tăng hngêi ối, tăng hngêi trung hriâm ăm kuăn, sap ing tơdroăng cheăng ki kŭn môi tiah mơhno kơchô tê mơdró tơmeăm lơ tíu ôu kâ, lăm cheăng pơrá hiăng châ gum ăm á tâi. Á hlo tơrŭm, hmâ khât môi tiah tơrŭm ối tung môi toăng hngêi, vâ kăn ƀô̆, kong chưk Phú Yên hdrối nah troh a Dak Lak nếo hmiên tuăn pêi cheăng ƀă pleăng dêi hnoăng ăm kong pơlê Dak Lak nếo ăm gá mơnhông khât”.

Klêi kơ’nâi ‘mot tơkŭm, vâ chê 700 ngế kăn ƀô̆, kong chưk, viên chưk ing Phú Yên hiăng troh pêi cheăng a tíu pêi cheăng dêi kong pơlê Dak Lak nếo. Maluâ pơhlêh tíu pêi cheăng, pơhlêh tíu rêh ối, tơdroăng cheăng pêi lơ tíu rêh ối, vâi pơrá mơnhên nhên ivá, hbfrâ rơnáu hmâ, hbrâ rơnáu tơrŭm ƀă pleăng dêi hnoăng.

Nâ H Như, pêi cheăng a Nhà hát ca múa nhạc dân gian Sao Biển tối tiah kố, ai hiâm mơno hâk vâ ƀă tơdroăng cheăng ƀă hiâm mơno tơrŭm pâ nhuô̆m dêi mâu vâi pú, mê pei cheăng ulâi xuân hơniâp ro.

“Ƀă á mê ulâi xuân chiâng vâ rêh, ki kal mê pin rêh ối tiah lâi, pâ nhuô̆m dêi rơpó môi tiah lâi ƀă tŏng gum dêi rơpó tung rêh kâ ối rêm hâi”.

Ƀă nâ Đỗ Anh Thư, kăn ƀô̆ Rak ngăn tíu ‘măn rak tơmeăm khoăng Phú Yên hơniâp ro ăm ‘nâi:

“Nôkố tơkŭm ƀă Dak Lak mê mê á kô tí tăng ‘nâi ƀă hriâm tơ’nôm mâu tơdroăng, pro tơdroăng ki mê chiâng môi túa ki lĕm, á chiâng kuăn mơngế dêi kong pơlê Dak Lak. Tăng ‘nâi ki hlê plĕng kong pơlê vâ kum kuăn pơlê, mâu túa ki lĕm tro ôh ti ai xếo tơdroăng pơrah kơpong”.

Tơdroăng ki hmâ tung tơdroăng cheăng nếo đi đo kal troh ivá mơeăm dêi kăn ƀô̆, kong chưk. Mâu tơdroăng ki hnê tối, tŏng gum teăm tơdrêng pơla mâu vâi pú ki pêi cheăng ƀă ƀă tíu pêi cheăng hiăng pro chiâng tơkŭm tung môi toăng hngêi tơdjuôm – Dak Lak. Maluâ troh ing lâi, maluâ hdrối nah rêh ối a kong pơlê ki lâi, tâi tâng pơrá dế rơtế ƀă dêi rơpó tơmiât troh môi tơdroăng pơkâ pêi tơdjuôm: mơnhông pơlê xiâm tơniăn, krá rơdêi.