Thôn R’Chai 3, cheăm Phú Hội, tơring Đức Trọng, kong pơlê Lâm Đồng ai 305 rơpŏng, ai 5 hdroâng kuăn ngo nhŏng o Xuăn, K’Ho, Khmer, Tày, Nùng rơtế tơdjuôm rêh ối, tung mê mơngế K’Ho cho hên má môi. Tung thôn ai 4 tơdroăng loi tĭng tiô khôp: Tin Lành, Phop, Cao Đài ƀă Pâ Xeăng.

Vâi krâ kuăn pơlê mâu hdroâng kuăn ngo tung thôn mơ-eăm chiu pá, rŭm môi tuăn tŏng kum dêi pó tung tơdroăng rêh ối. Klêi kơ’nâi tro tâ pơreăng COVID-19 châ mơdât tâi tâng, vâi krâ kuăn pơlê mâu hdroâng kuăn ngo, mâu tơdroăng loi tĭng, tiô khôp hiăng mơ-eăm tơtêk pêt mơjiâng tơmeăm, mơjiâng pơlê rế hía rế mơnhông mơdêk tŭm túa. Hơnăm 2022, pêi lo liăn rêm pơ’leăng mâ mơngế châ 58 rơtuh liăn. Lâp thôn bu ai 2 rơpŏng kơtiê.

Pôa Ka Să Ha Nhiếu, Kăn cheăng tung Vi ƀan Măt trâ̆n Tơnêi têa Việt Nam kong pơlê Lâm Đồng cho ngế ki kuăn pơlê loi tơngah a thôn R’Chai 3, cheăm Phú Hội, tơring Đức Trọng tối:

“Á phiu ro xua nôkố vâi krâ kuăn pơlê tung thôn hiăng ‘nâi hriâm kơ-êng nhŏng o mơngế Xuăn, ‘nâi pơ’lêh tơdroăng tơmiât pêt mơjiâng tơmeăm, pơ’lêh pêt mơjiâng tơmeăm pêi lo ing chiâk deăng. Vâi krâ kuăn pơlê a kố hiăng ‘nâi pêt mâu loăng plâi ki kơnâ liăn, môi tiah: Po hăng, lagim, plâi tơmât, kơchâi drêh, su su, kơphế ƀă hía hé. Tung thôn kố châ dâng sap ing 30 troh 40% rơpŏng pêt lagim, á hlo tơdroăng pơ’lêh nhên tung pêt mơjiâng tơmeăm’’.

Dà Sar cho cheăm kơpong hơngế hơngo dêi tơring Lạc Dương, kong pơlê Lâm Đồng, cho môi tung mâu cheăm kơpong hdroâng kuăn ngo rĕng châ plah thôn pơlê nếo. Tâi tâng lâp cheăm ai 7.832 rơpŏng kuăn pơlê, ƀă lối 31.200 pơ’leăng mâ mơngế; tung mê vâi krâ kuăn pơlê hdroâng kuăn ngo châ vâ chê 70% pơ’leăng mâ mơngế. Tung mâu hơnăm hiăng hluâ, kơnôm khên tơnôu pơ’lêh ing kơphế hiăng krâ mê pêt yâu – păn hdrong xo prế ƀă pêt mâu prá lâi, kơchâi drêh – plâi – pôm, vâi krâ kuăn pơlê hiăng pêi lo liăn châ hên.

Pôa Cil Ha Ồn, hdroâng kuăn ngo K’Ho, ối a thôn 3, cheăm Dà Sar, tơring Lạc Dương, kong pơlê Lâm Đồng tối ăm ‘nâi: Ki hên vâi krâ kuăn pơlê a kố tiô khôp Tin Lành, ƀă châ khu râ kăn pơkuâ pro tơ’lêi hlâu mơjiâng 2 toăng hngêi khôp kân rơdâ. Kơnôm cheăng kâ mơnhông, vâi krâ kuăn pơlê hdroâng kuăn ngo tiô khôp Tin Lành a kố hiăng ai tơmeăm vâ tơdah Noel hơtôu – hơniâp lĕm.

“Hơnăm kố, á mơnê khu râ kăn pơkuâ hiăng tơmâng mơdât pơreăng COVID-19 to lâi khế kố, xua mê, mot a rơnó Noel kố lơ pơkoăng, diâp ŏng mé pơrá tơkŭm po tơniăn. Vâ Noel thăm phiu ro ƀă hơtôu, ngin krếo khu tôu chêng koăng rơtế veăng’’.

Jâ Liêng Jrang K’Sáu – Kăn hnê ngăn Khu pơkuâ kuăn pơlê pêi châk deăng cheăm Dà Sar, tơring Lạc Dương tối ăm ‘nâi: Tung tơdroăng mơjiâng thôn pơlê nếo, pakĭng hnoăng dêi mâu khu cheăng rêm râ, mâu ƀok pơkuâ tơdroăng khôp tung pơlê hiăng mơhnhôk vâi krâ kuăn pơlê kuăn khôp thăm veăng.

Hên rơpŏng hiăng pleăng tơnêi pro troăng kân, thăm veăng mơjiâng hâi pêi cheăng. Kơnôm mê, ngiâ méa thôn pơlê hiăng pơ’lêh hên. Jâ Liêng Jrang K’Sáu, Kăn hnê ngăn Khu kuăn pơkuâ pêi chiâk deăng cheăm Dà Sar mơnhên: tâi tâng vâi krâ kuăn pơlê kuăn khôp a kố ôh tá xê pêi rak krâu  troăng hơlâ dêi Đảng ƀă Tơnêi têa mê ối rêh tro ƀă troăng pêi pro ‘’lĕm ‘na châ lĕm tá ‘na mơhúa’’.

“Mâu ƀok pơkuâ tơdroăng khôp vâi đi đo cho ngế prôk hdrối, djâ troăng ahdrối tung pêi pro lĕm tro troăng pơkâ, troăng hơlâ dêi Đảng, luât dêi Tơnêi têa, thăm veăng mâu roh mơhnhôk, veăng mâu roh hôp xua khu râ kăn pơkuâ pơlê, cheăm tơkŭm po vâ mơhnhôk vâi krâ kuăn pơlê tiô khôp pêi tiô lĕm’’.

Bu u ối môi măng tĭng nếo cho mot hơnăm nếo 2023, môi rơnó Noel nếo hiăng troh. Tung mâu hâi hiăng hluâ, khu râ kăn pơkuâ kong pơlê Lâm Đồng ƀă mâu tơring tung kong pơlê hiăng troh lăm pôu, rơkâu Hâi Tĭng kân Pâ Xeăng chu chiâng kuăn mơngế a mâu hngêi khôp, mơnhên ƀă kheăn kơdeăn mâu tơdroăng veăng kum dêi mâu ƀok pơkuâ tơdroăng khôp, mâu kuăn khôp tung kong pơlê tung mâu kơvâ cheăng kâ – rêh ối pơlê pơla, mơnhông mơdêk pêt mơjiâng tơmeăm, rak tơniăn cheăng kâ.

Khu râ kăn pơkuâ kong pơlê Lâm Đồng mơnhên khu râ kăn pơkuâ mâu khu râ môi tuăn, pro tơ’lêi hlâu lĕm má môi vâ mâu kuăn khôp; tơxâng tơdroăng kal vâ loi tĭng tiô khôp dêi vâi krâ kuăn khôp. Ƀă, pói vâ mâu ƀok, ƀok Tin Lành, mâu ƀok muăn, jâ chĭng, yao phu pơkuâ tơdroăng khôp pơtối mơnhông mơdêi hiâm mơno nhuô̆m pâ Pâ Xeăng, nhuô̆m pâ tơnêi têa, mơhnhôk vâi krâ kuăn khôp pêi cheăng pêt mơjiâng tơmeăm, mơdêk tơdroăng rêh ối, ƀă thăm veăng mơjiâng khu rŭm môi tuăn tâi tâng hdroâng kuăn ngo.