VOV4.Xơ Đăng - Vi ƀan ngăn ‘na tơrŭm tuăn dêi mâu khu tiô khôp Pâ Xeăng Việt Nam kong pơlê Dak Lak nếo tơkŭm po hneăng hôp mâu ki tiô khôp Việt Nam mơjiâng ƀă kring vế tơnêi têa kong pơlê Dak Lak rôh má 7. Kong pơlê Dak Lak nôkố ai lối 217 rơpâu ngế tiô khôp, dế tơkŭm khôp a 108 tơring, kơpong khôp. Pêi pro tiô tơdroăng mơhnhôk “Tâi tâng kuăn pơlê môi tuăn mơjiâng thôn pơlê nếo, kơphô̆ rơkê plĕng’’, mê kuăn pơlê ki tiô khôp Pâ Xeăng hiăng rơtế ƀă mâu kuăn pơlê a mâu pơlê cheăm mơ-eăm ‘no hnoăng tơlo châ chât rơtal liăn, pleăng hrĭng met karê tơnêi vâ pro troăng, mơjiâng, mơdêk po rơdâ troăng tung thôn, cheăm.

Tiú xiâm Vi ƀan ngăn tơrŭm môi tuăn ‘na tơdroăng Khôp Việt Nam hbru tơmeăm hlối rơkâu hâk mơnê hneăng hôp klêi tơniăn

Hên mâu hngêi khôp, hngêi ki kuăn pơlê tơkŭm khôp hiăng ‘no liăn mơjiâng pro tíu xah hêi, pơtâp ivá, hơdruê xuâng, kum mâu vâi o mâu ngế ki phô̆m xông kân ai plông xah hêi vâ mơdêk mo lĕm ivá. Tung la ngiâ, kuăn pơlê ki tiô khôp a mâu pơlê cheăm tơring tung kong pơlê kô mơ-eăm môi tuăn dêi rơpó kum dêi rơpó mơnhông cheăng kâ, mơdêk mâu tơdroăng cheăng pêi ki ‘ló tro, rơtế ƀă kuăn pơlê tung lâp kong pơlê mơjiâng pơlê pơla kro mơdrŏng.

VOV Tây Nguyên/Tơplôu: Gương