Teăng tơdroăng ki pơtối tơdjêp pơ'lêh kơxô̆ tiô kŏng ngê̆, hneăng hôp mot tung mâu tơdroăng ki tơdjâk troh tơdroăng pêi cheăng kâ, tê mơdró rêm hâi dêi kuăn pơlê pêi chiâk deăng môi tiah tăng 'nâi ƀă mơnhên tơdroăng, xúa AI, livestream, tê tơmeăm tung điê̆n tưh, rak ngăn tơmối ƀă tơdjêp kơchơ mơdró; tơpui tơno 'na túa ki kuăn pơlê pêi chiâk deăng pơtối pơ'lêh kơxô̆ ing tơdroăng kal vâ.

Jâ H'Giang Niê, Kăn hnê ngăn Khu kuăn pơlê pêi chiâk deăng kong pơlê Dak Lak tối tiah kố, Dak Lak ai hên tơmeăm khoăng ki ai hlâu, ki pơxúa 'na pêi chiâk deăng, ƀă hên tơmeăm pêi lo ing chiâk deăng ki phá tơ-ê. Maluâ, pêi lo tơmeăm dâi lĕm bu nếo cho rôh apoăng. Ngế ki pêi ối kal tơmâng ngăn troh túa pơkâ pro lĕm mâ ngăn, tơdrong, kơxâk, kơthung, tĕm tem mơnhên xiâm kối, mơjiâng inâi, tơbleăng ƀă ivá pêi pro tiô tơdroăng ki rơhêng vâ dêi kơchơ mơdró. Tơdrêng amê, athế djâ dêi tơmeăm troh tung măng internet vâ mơdêk ki kơnía, tê tơmeăm. Kố cho tơdroăng ki kal ƀă ki khât tung hneăng nôkố.

“Vâ tŏng kum kuăn pơlê pêi chiâk pêi deăng châ pơkuâ xêh kơchơ mơdró, ki má môi dêi ngin cho tơkŭm po mâu lâm hnê hriâm, kum vâi krâ nhŏng o hlê plĕng tơdroăng ki xiâm. Tơdrêng amê, Khu hnê mơhno kuăn pơlê pêi chiâk pêi deăng tơrŭm ƀă mâu KOC, KOL ki kuăn pơlê loi tơngah vâ djâ tơmeăm pêi lo ing chiâk deăng a mâu tíu tê mơdró điê̆n tưh. Klêi kơ'nâi rôh pêi cheăng kố, ngin kô mơjiâng khu tŏng kum tê tơmeăm pêi lo ing chiâk deăng, tơdrêng amê hnê ăm vâi krâ nhŏng o túa livestream tê tơmeăm xuân môi tiah túa ki tơdjêp ƀă mâu tíu tê mơdró tung măng ki ê. Troăng hơlâ ƀă tơdroăng ki rơhêng vâ kân má môi dêi ngin cho: Kuăn pơlê pêi chiâk deăng a lâi, Khu ngăn kuăn pơlê pêi chiâk deăng amê; Khu ngăn kuăn pơlê pêi chiâk deăng đi đo cho tíu ki loi tơngah má môi rơtế prôk ƀă vâi krâ nhŏng o tung tơdroăng pêi cheăng hơ'lêh kơxô̆."

A Hneăng hôp, mâu kăn xuân pâ thế tơpui troh tơdroăng mơjiâng tuăn loi ƀă tơmối. Mâu tơdroăng pơkâ tơpui tơno mê cho tơdrăng xiâm rêi, mah tơmeăm pê lo, QR, tơdroăng pêi lo, tơdroăng tơbleăng tối tơdrăng ƀă rak ngăn krâu mơngế ki tê tơmeăm.

-Ing tơdroăng ai khât hên hơnăm tê tung măng châ tơƀrê, jâ Trần Thị Bích, môi ngế kuăn pơlê ối acheăm Ea Sup tối tiah kố, bú hbrâ tŭm  tơdroăng ăm ‘nâi 'na tơmeăm khoăng, rah xo môi ƀâng tơbleăng ki tơtro, mơjiâng tơdroăng ƀă pro tơ'lêi hlâu hmâ đi đo ƀă mơngế ki ngăn, tơdroăng ki mơ'no tung kơxô̆ nếo châ tơƀrê.

"Ki xiâm pơkâ tơdroăng ki châ tê tơmeăm cho tơmeăm thế lĕm, tơdroăng hơ’muăn ‘na tơmeăm thế tơdrăng, rơtế ƀă troăng hơlâ rak ngăn mơngế rôe xúa kơ'nâi tơniăn lĕm. Tâng bu to livestream tơpui to tơdroăng mê gá pá vâ mơhnhôk mơngế rôe xúa, xua pin ôh tá xê mâu KOL lơ KOC ki vâi ô eăng ai ivá tơdjâk kân. Xua mê, ki pơxúa khât ƀă ki dâi lĕm khât dêi tơmeăm cho ki xiâm ăm tơdroăng châ tơ-ƀrê má môi."

-Tung tơdroăng, Khu tơkŭm po tơbleăng khu Zalo "Kuăn pơlê pêi chiâk deăng Dak Lak tê tơmeăm online", mơjiâng tíu tơdjêp pơla kuăn pơlê pêi chiâk deăng, khu pêi cheăng tơrŭm ƀă mâu khu ki ai tơmeăm kal vâ tơbleăng, tê mơdró tung điê̆n tưh.