Tơdroăng ki klâ xoăng kố ngăn tung mâu pơkâ tíu cheăng ki pơtăng, tơ’mô ‘na khôi túa tơlá, tơ’lêi hlâu ‘na troăng prôk, rak vế tơniăn cheăng lêng, gâk kring ƀă mơnhông cheăng kâ rêh ối pơlê pơla. A tơring Čư̆ Prông, ai 18 tíu pêi cheăng, klêi ‘mot tơkŭm bu ối 6 to cheăm; tung mê cheăm Ia Piar châ pro tung tơdroăng ki klâ xoăng tiô 3 to cheăm Ia Piar, cheăm Ia Ga ƀă cheăm Ia Vê.

Pôa Siu Khlo, kăn pơkuâ ngăn Đảng cheăm Ia Vê, tơring Čư̆ Prông ăm ‘nâi, kơnôm pêi pro hnoăng cheăng hnê tối mê kuăn pơlê ‘nâi nhên tŭm tơdroăng ‘na troăng pơkâ ‘mot tơkŭm sap ing kong pơlê troh cheăm ƀă pơhlêh túa cheăng kăn pơkuâ 2 râ.

“Drêng pin lăm troh a mâu pơlê, cheăm trâm kuăn pơlê xuân ‘nâi hiâm mơno dêi vâi ‘na tơdroăng ‘mot tơkŭm mâu kơ koan cheăng tơnêi têa, vâi krâ môi tuăn khât ƀă troăng pơkâ kố. Malối cho troăng pơkâ mơjiâng khu kăn pơkuâ 2 râ (tah lôi râ tơring). Hlo tơdroăng ki ‘mot tơkŭm kố xua pơxúa tơdjuôm mê kuăn pơlê vâ môi tuăn; ôh ti ai tơdroăng tơpui tối ôh ti vâ ƀă troăng pơkâ ‘mot tơkŭm mâu kơ koan, tíu pêi cheăng. Vâi krâ môi tuăn, môi hiâm mơno ƀă kô rơtế ƀă Đảng ƀă Tơnêi têa pin”.