VOV4.Xơ Đăng - Mâu hâi ki kố, tơdroăng koh phiu ro hâi mơjiâng tơnêi têa dế ai a lâp lu mâu pơlê Tây Nguyên. A ƀuôn Phôk, cheăm Ea Ribin, tơring Lăk, môi pơlê kơpong hơngế hơngo dêi kong pơlê Dak Lak, hlá cơ khêi hơlŏng trĭng kơneăng a rêm hơlâ troăng kân. Pôa Y Ƀlor Lưk, kăn pơkuâ pơlê ƀuôn Phôk, cheăm Ea Rbin tối ăm ‘nâi, tơdroăng dêi hâi Mơjiâng tơnêi têa vêh tơbâ kuăn pơlê pâ khôi túa rŭm môi tuăn, tiô troăng dêi Đảng, Tơnêi têa vâ mơjiâng pơlê rế hía rế kro mơdrŏng lĕm.

“Má môi ngin đi đo pơtâng tối ăm kuăn pơlê kơtúa hlá cơ vâ tơbâ hâi lơ 2/9 Hâi mơjiâng tơnêi têa, tơdroăng phiu ro kân. Xuân môi tiah rêm hơnăm rêm toăng hngêi kơtúa hlá cơ. Ngin pơtâng tối ăm kuăn pơlê hlê plĕng tơ’nôm ki kơnía dêi hâi Mơjiâng tơnêi têa cho hâi Têt tơniăn krê dêi hdroâng mơngế pin. Pâ Pôa Hồ ƀă mâu ngế hiăng hlâ ăm tơnêi têa, mâu ngế ai hnoăng ƀă kăch măng kuăn pơlê tiô troăng hơlâ dêi Đảng, tơnêi têa. Kuăn pơlê ‘nâi rŭm môi tuăn, drêng mơhnhôk tơdjuôm ivá kum mơngế kơtiê, têa kân lân lu lơ trếo ‘mêi dioxin kuăn pơlê veăng kơhâ khât păng ‘nâng’’.

*** Pôa Đinh Đăm (hdroâng kuăn ngo Bơhnéa) cho krâ pơlê thôn Kon Sơ Nglok, cheăm Hà Đông, tơring Đăk Đoa, kong pơlê Gia Lai. Pro mố đô̆i sap ing hơnăm 1963, pôa Đinh Đăm châ hlo rôh tơplâ a Tây Nguyên ki ó, hên vâi pú hiăng hlâ vâ rak vế tơdroăng ki tơniăn krê. Xua mê, pôa Đinh Đăm đi đo tối hiâm mơno ‘nâi pâ mơnê kơ pôa Hồ hiăng pơkuâ kuăn pơlê pro tơniăn hdroâng mơngế, tơniăn, hơniâp ro môi tiah hâi kố:

“Pôa Hồ cho ngế ki hiăng mơjiâng tơnêi têa Việt Nam Dân chuh Kŏng hoa, pro pơxúa hơniâp ro ăm kuăn pơlê. Kơnôm châ tơleăng, tiô rơkong Pôa Hồ hnê, kuăn pơlê phiu ro, tơrŭm, mơ-eăm pêi cheăng kâ, hnê mơhno, hriâm ƀối dêi rơpó ‘na túa ki păn, pêt kế tơmeăm pro pơxúa tơƀrê.

Sap ing châ tơleăng lĕm troh nôkố tơdroăng rêh ối hiăng hơ’lêh khât. Hdrối nah ôh tá ai rơxế hon đa, mê nôkố ki hên mâu rơpŏng pơrá hiăng ai rơxế, tá mâu kơmăi kum tung pêi chiâk deăng. Krê cheăm Hà Đông nôkố ai to chât toăng. Mê tơvi, kơtuh hngíu pơrá hiăng ai, tơdroăng rêh ối hiăng hơ’lêh hên”.

*** A kơpong tơkăng kong Tuy Đức, kong pơlê Dak Nông, mâu hâi kố hlo to hlá cơ Tơnêi têa, leh tơbâ Hâi mơjiâng Tơnêi têa 2/9. Pôa Y Thái, Kăn phŏ pơkuâ hnê ngăn cheăng Đảng tơring Tuy Đức, tối ăm ‘nâi, tơring pêng păm tơdroăng khôi túa kăch măng, cho pơlê xiâm dêi ngoh khên tơnôu hdroâng kuăn ngo N’trang Lơng – ngế pơkuâ roh rơxông tơplâ xâ Pơhlăng mot tơplâ tơbriât Tây Nguyên mâu hơnăm apoăng chal 19; kơpong tíu pêi cheăng kăch măng Quảng Trực – môi tíu ôm hyô kăch măng tung roh tơplâ xâ Mih tơleăng lĕm tơnêi têa.

Mơnhông mơdêk khôi túa cheăng kăch măng, mâu hơnăm hiăng hluâ, vâi krâ kuăn pơlê mâu hdroâng kuăn ngo a Tuy Đức pơtối tơrŭm môi tuăn kum dêi pó mơnhông mơdêk cheăng kâ.

Pôa Y Thái, tối ăm ‘nâi:

“Ing mâu tơdroăng châ tơƀrê, tơring hiăng tơbleăng pơkâ ‘na tơdroăng pêi cheăng kơdroh kơtiê krá tơniăn tung mâu pơlê vâi krâ hdroâng kuăn ngo amê, tung mê kơjo tơdroăng kơxô̆ liăn ối tung mâu tơdroăng ăm mâu tơring kơtiê, tơdroăng mơdêk tơdroăng rêh ối kế tơmeăm hiâm mơno ăm vâi krâ kuăn pơlê hdroâng kuăn ngo ƀă tơdroăng mơjiâng thôn pơlê nếo vâ tơkŭm mơ’no liăn cheăng ăm kuăn pơlê. Mâu cheăm mơjiâng tơdroăng pơkâ pêi ki nhên, tơtro ƀă  rêm pơlê, pêi pro tơdrêng ƀă khu cheăng ki ê pêi pro.

Khu pơkuâ cheăng Đảng tơring xing xoăng, pơcháu hnoăng cheăng ki nhên ăm rêm ngế tung khu pơkuâ thế pơtối séa ngăn, mơhnhôk mâu tíu pêi cheăng, thế pêi khât ƀă châ tơƀrê khât, tơniăn pêi pro châ tơƀrê tơdroăng kơdroh kơtiê ăm mâu pơlê’’.

VOV Tây Nguyên

A Sa Ly - Katarina Nga tơplôu ƀă tơbleăng