*Tiô Khu ngăn cheăng tơnăng ká xi xŏng ƀă Chuăn rơlố kong pơlê Dak Lak, tung hâi má 5 têt, hiăng ai 10 toăng tuk tơnăng ká xi xŏng tơnăng ká ngừ đăi dương tung pơla Têt troh a kơno, ƀă tâi tâng ki hngăm dêi ká lối 50 tâ̆n. Tiô tối hdrối tung mâu hâi la ngiâ, dâng 70 toăng tuk tơnăng ká pơtối vêh troh a kơno, mơni kô châ hên ká xi xŏng apoăng hơnăm.

Klêi kơ’nâi séa ngăn ăm hlo, mâu ngế ki pơkuâ ngăn tuk ƀă ngế ki cheăng tung tuk pêi pro kơtăng mâu pơkâ tung pơla tơnăng ká xi xŏng a têa kơxĭ.  Sap ing hâi má 5 têt, a kơno ká Đông Tác, hên plong tuk tơnăng ká ngừ đăi dương hiăng vêh troh a kơno tung tơdroăng hơniâp ro phiu niu. Mâu ngế ki roê, khu mơdró kâ ki roê xo hiăng ai mâ sap ing kơxo má vâ roê mâu ká xi xŏng drêng plong tuk troh a kơno. Khu mơdró kâ roê ăm ‘nâi, ká ngừ ki tơnăng a têa kơxĭ Trường Sa rôh kố gá hngăm, lĕm, châ mâu kong têa ki pro pá môi tiah châu Âu, Mih ƀă Nhuk hâk vâ rôe.

*Klêi kơ’nâi Têt hơnăm nếo, a mâu kơno tuk ká tung kong pơlê Khánh Hòa, lối hrĭng toăng tuk tơnăng ká thâ hbrâ ăm rôh lo pêi cheăng apoăng hơnăm. Pakĭng tơngah châ ká hên, kuăn pơlê tơnăng kâ thăm rak vế luât pơkâ dêi IUU, rak tơdroăng tơnăng ká krá tơniăn.

A Kơno tuk cá Hòn Rớ, ing kơxo má, mâu tuk tơnăng ká  pơtối chơ têa châu, tơ’nôm prí hngíu, mâu hlâm ƀă tăng ngăn kih thuât kơmăi hdrối vâ lăm a têa. Klêi tơrŭm ƀă hbrâ tŭm tơdroăng chêh tung kơmăi ‘na cheăng tơnăng ká, lâp kong pơlê Khánh Hòa nôkố ai dâng 5.200 toăng plong tơnăng ká ai hlá mơ-éa, hdró hlối ăm phêp tơnăng ká, châ 100%. 

Tơdroăng rak ngăn krâu khât khu tuk tơnăng ká sap ing hâi apoăng, pơxúa tăng ‘nâi xiâm gá ƀă hbrâ mơdât tro xôi. Hơnăm 2025, kong pơlê Khánh Hòa tơnăng châ lối 238 rơpâu tâ̆n ká, tê ăm kong têa ê châ 870 rơtuh USD.