Kơxê lơ 21/5, teăng mâ Vi ƀan pơkuâ Kuô̆k hô̆i, pôa Bùi Văn Cường, Kăn xiâm chêh tôm xo rơkong Kuô̆k hô̆i tơbleăng mơ-éa pơkâ pơhlêh Tơdroăng Hneăng hôp má 7. Mơ-éa tối nhên, tiô tơdroăng rơkong tơpui dêi khu râ kăn ai hnoăng, pêi pro pơkâ dêi luât ƀă pơkâ nôkố pêi kêi đeăng tâi tâng khu tơrŭm cheăng Tơnêi têa, klêi kơ’nâi tơmâng séa ngăn pơkâ dêi Ngế pro xiâm hnê ngăn tơnêi têa, Vi ƀan pơkuâ Kuô̆k hô̆i pơkâ thế Kuô̆k hô̆i ăm phêp tơ’nôm tơdroăng kĭ pơkâ dêi Ngế pro xiâm hnê ngăn tơnêi têa ‘na tơdroăng ăm pơtê cheăng Ngế xiâm pơkuâ Kŏng an.

Kơ’nâi mê, Kuô̆k hô̆i hiăng têk kŏng môi tuăn tơdroăng pơhlêh Tơdroăng Hneăng hôp má 7. Hdrối mê, a Hneăng hôp roh má 9, Khu xiâm môi tuăn tơdroăng tơbleăng Kăn cheăng tung Khu xiâm kal kí, Ngế xiâm pơkuâ Kŏng an, Đăi tươ̆ng Tô Lâm, vâ Kuô̆k hô̆i hneăng má XV rah xo ăm to pro Kăn xiâm hnê ngăn tơnêi têa hneăng hơnăm 2021 – 2026.

Kơxê lơ 21/5, Klêi kơ’nâi tơpui tơno, têk kŏng môi tuăn tơbleăng inâi vâ rah xo Kăn xiâm hnê ngăn tơnêi têa, Kuô̆k hô̆i tơkŭm po tâ phĭu rah xo Kăn xiâm hnê ngăn tơnêi têa.