Pơtối roh hôp má 4, Kuô̆k hô̆i hneăng 15, kơxo lơ 4/11, Kuô̆k hô̆i pơtối kơ êng pôa Nguyễn Mạnh Hùng, Ngế xiâm ngăn tơdroăng nếo ai troăng hyôh măng. Tơdroăng kơ-êng ki hên kơ-êng rơtâ tâ mâu tơdroăng vâ tơpui leăng mơnhên mâu ngế, khu tơrŭm cheăng ki chêh đăng mâu tơdroăng tơpui ‘mêi ôh tá tro, ôh tá ai khât tung trang chêh điê̆n tưh, ti tăng ‘nâi, tê rôe hmâng vâ mâu tơdroăng chêh ‘măn dêi mơngế, hêak pơloi chêh tung kơmăi. Pôa Nguyễn Mạnh Hùng, Ngế xiâm ăm ‘nâi: Hdrối nah bú ai tơbleăng a mâu kơ koan chêh hlá tơbeăng, tiô pơkâ, mâu kơ koan chêh hlá tơbeăng thế séa ngăn, ‘nâi tơniăn tro khât ‘nôi mê nếo tơbleăng tro tiô luât. 

Péa hơnăm hdrối ai tơdroăng ki nếo tơbleăng ad network (măng ki tơbleăng tơdrêng tiô troăng hyôh pro xiâm ai hnoăng cheăng pêi tơdế rá), mê mâu kơ koan chêh hlá tơbeăng vâ tối hiăng tah lôi tơdroăng ki chiu pôu râng. Khu xiâm hiăng séa ngăn, tí tăng ‘nâi plê̆ng, mâu kơ koan chêh hlá tơbeăng hiăng hlê plĕng tung tơdroăng mê. Xuân tung kơxo lơ 4/11, Ngế  xiâm ngăn ‘na mơjiâng tơmeăm khoăng, pôa Nguyễn Thanh Nghị ƀă mâu kăn cheăng tung Chin phuh hiăng tiâ tơdroăng kơ-êng nhên hlối tŭm mâu tơdroăng tối dêi mâu kăn Kuô̆k hô̆i ‘na tơdroăng mơjiâng tơmeăm khoăng.