Pơtối tơdroăng hneăng hôp má 4, hâi lơ 31/10, Kuô̆k hô̆i mơdoh plâ hâi tơpui tơno ‘na Tơbleăng tơdroăng séa ngăn ‘’Tơdroăng pêi pro tiô troăng hơlâ, luât ‘na pêi pro kơdĭng, hbrâ mơdât mơ’nhê tê kơtê liăn ngân, kế tơmeăm hneăng hơnăm 2016 – 2021’’ tung kơpong tơnêi têa. Mâu kăn teăng mâ Kuô̆k hô̆i xông tơpui pơkâ thế rak tơniăn mâu tơdroăng tơvâ tơvân, pá puât tung pơkuâ tíu pêi cheăng tơnêi têa, vâ mâu pơkâ châ tơniăn tơdroăng ki chiâng pêi pro, kơdĭng ƀă châ tơƀrê.

Klêi kơ’nâi séa ngăn ăm hlo, tơdroăng pơkuâ, xúa liăn ngân tơnêi têa, mâu kơxô̆ liăn tơnêi têa ki ê ai hên troăng pơ’lêh, tơniăn krá tơniăn, kơdĭng ƀă châ tơƀrê tâ. Laga, tơbleăng xuân tối nhên: tơdroăng mơjiâng, mơnhên tơdroăng tối hdrối liăn ngân tơnêi têa, tá hâi tơtro ƀă tơdroăng nôkố. Rơpâu tơdroăng tơkêa bro hrá pêi pro, rơpâu tơdroăng tơkêa bro hluăn ing kơtiê, mơ’nhê tê kơtê pro hía roh tơ’lêi mơnhông mơdêk tơnêi têa.

Kuô̆k hô̆i mơdoh plâ hâi 31/10 vâ séa ngăn tơdroăng pêi pro troăng hơlâ, luât ‘na pêi rpo kơdĭng, hbrâ mơdât mơ’nhê liăn tê kơtê hneăng hơnăm 2016 – 2021.

Mâu kăn teăng mâ pơkâ thế ôh tá lôi ton mâu tơdroăng tơkêa bro ki ton Tơnêi têa kum tung mơnhông cheăng kâ rêh ối pơlê pơla, ki má lối cho mâu kế tơmeăm thôn pơlê kơpong kong ngo, kơpong vâi krâ hdroâng kuăn ngo. Tung mâu troăng pêi châ tối, mâu kăn teăng mâ tối nhên tơdroăng mơ’no liăn cheăng ki xiâm ƀă tah lôi mâu tơdroăng tơdâng tơ’mô tung xing xoăng liăn ngân.

Ki rơhêng vâ tối, pơkâ kơdĭng, hbrâ mơdât mơ’nhê tê kơtê kal troh tơdroăng hlê plĕng ƀă hiâm mơno dêi mơngế kăn pơkuâ, ki má lối cho ngế ối a ko dêi khu tơrŭm cheăng kơ koan, tíu cheăng, kong pơlê.