Pơtối rôh pêi cheăng a Hneăng hôp má 5, Kuô̆k hô̆i mơdoh chôu tung hâi lơ 29/5 vâ séa ngăn khât ‘na tơdroăng ki mơhnhôk, pơkuâ ngăn ƀă xúa mâu kơxô̆ liăn kum ăm hnoăng cheăng hbrâ mơdât pơreăng COVID-19; tơdroăng pêi pro troăng hơlâ, luât ‘na khăm pơlât, tíu khăm pơlât hbrâ mơdât. Tối tơbleăng a ngiâ Kuŏk hô̆i, Kăn xiâm pơkuâ Vi ƀan Pơlê pơla dêi Kuô̆k hô̆i, kăn phŏ pơkuâ djâ khu kăn séa ngăn dêi Kuô̆k hô̆i cho pôa Nguyễn Thúy Anh ăm ‘nâi, troh khế 4/2023, Khu kăn séa ngăn hiăng châ hmâng mâu hlá mơ-éa tối tơbleăng ƀă 15.659 kơtâ hlá mơéa.

Khu kăn séa ngăn ăm ‘nâi, ‘na mơhnhôk tơlo liăn ngân hbrâ mơdât pơreăng, Chin phuh riân ngăn tâi tâng kơxô̆ liăn kum tơdrêng ăm hnoăng cheăng hbrâ mơdât pơreăng ƀă pêi pro troăng hơlâ tŏng kum rêh ối pơlê mơhnhôk veăng tơlo pơla hơnăm 2020 – 2022 dâng 230 rơpâu rơtal liăn, tung mê, mơhnhôk tơlo sap ing liăn ngân cho lối 186 rơpâu rơtal; u ối cho sap ing kơxô̆ liăn veăng tơlo ki ê.

Tơdjâk troh tơdroăng ki roê kit test dêi Kŏng ti tơlo liăn Việt Á, Khu kăn séa ngăn ăm ‘nâi troh apoăng khế 5, tiô tối tơbleăng dêi Khu xiâm ngăn Kŏng an, mâu kơ koan séa ngăn hiăng pơsăm tối 30 rôh bro xôi ƀă 107 ngế.