Pơtối hneăng hôp má 8, hâi kố lơ 7/11, Kuô̆k hô̆i pêi cheăng a hngêi hôp kân, tơpui ‘na tơdroăng tơkêa Luât ‘mâi pơhlêh, ‘mot tơ’nôm mâu tơdroăng dêi Luât Chứng khóan, Luât Kế toán, Luât Kiểm toán tơniăn krê, Luât Liăn ngân tơnêi têa, Luât pơkuâ ngăn, xúa kế tơmeăm tơdjuôm, Luât Pơkuâ ngăn nâp hnoăng liăn mơhá, Luât ‘Măn kơdĭng tơnêi têa ƀă tơdroăng tơkêa Luât On tơhrik (‘mâi pơhlêh).

Kuô̆k hô̆i tơpui ‘na tơdroăng tơkêa Luât On tơhrik (‘mâi pơhlêh), tiô hlá mơ-éa pơtroh, tơdroăng tơkêa Luât On tơhrik klêi kơ’nâi 20 hơnăm tơbleăng pro ƀă 4 rôh rơnêu ‘mot tơ’nôm, la troh nôkố xuân ối ai mâu tơdroăng ki tá pêi pro châ tiô tơdroăng púi vâ tơbleăng mâu troăng hơlâ dêi Đảng ƀă kơvâ cheăng on tơhrik tối tơdjuôm ƀă on tơhrik tối krê. Kơxop hlá mơéa Luât On tơhrik ‘mâi pơhlêh mê cho 9 chương ƀă 119 troăng tâk 60 troăng tâng vâ pơchông ƀă luât ki ton.

Tiô pôa Nguyễn Quang Huân, ngế ki lo ing Bình Dương kơxop hlá mơ-éa luât kal ai mâu pơkâ nhên ‘na on tơhrik ki vêh pro vâ tơmiât troh on tơhrik ngiât. Hriăn ngăn tơdroăng tơkêa Luât On tơhrik ‘mâi pơhlêh Cẩm Hà Chung, ngế ki lo ing Phú Thọ tối tiah kố tơdroăng tơkêa luât pơkâ tơdroăng tŏng gum kal nhên, ví pơkâ tơleăng bô bối pá vâ pêi pro.