Pơtối tơdroăng hneăng hôp má 4, Kuô̆k hô̆i hneăng má 15, kơxo lơ 24/10, a Hà Nội, Kuô̆k hô̆i tơpui tơno a hngêi hôp kân ‘na mâu tơdroăng ki xiâm ki ối ai mâu rơkong tơpui tối ki pha ra pá dêi rơpó dêi kơxop hlá mơé Luât khăm pơlât ki ‘mâi hơ’lêh. Kơxop hlá mơéa Luât khăm pơlât ki ‘mâi hơ’lêh klêi kơ’nâi châ ‘mâi rơnêu ai 12 chương ƀă 121 troăng, hên tâ 15 troăng tâng pơchông ƀă kơxop hlá mơéa ki pơtroh ăm Kuô̆k hô̆i a hneăng hôp má pái, hên tơdroăng ki kal hiăng châ pêi pro klêi,laga, ối ai mâu tơdroăng ki kal pơtối châ tơmâng, ‘mâi rơnêu.

Tâ tá hneăng hôp má 4 Kuô̆k hô̆i hneăng 15

Luât Khăm pơlât  cho luât ki kal dêi kơvâ ngăn pơkeăng, pơkâ troăng pêi cheăng rak ngăn ƀă tơdroăng mơnhông krá tơniăn ton dêi hnoăng cheăng rak ngăn, pơlât ivá kuăn pơlê,ai tơdjâk kân troh kuăn pơlê xuân môi tiah mâu tíu khăm pơlât, kăn ƀô̆ khăm pơlât; châ kuăn pơlê, kơvâ khăm pơlât tơkôm pơkâ tơdroăng ki loi tơngah vâ hơ’lêh ki rơkê plĕng tung rak ngăn ivá kuăn pơlê ƀă bro chiâng tơdroăng ki rak vế tơniăn ăm tơdroăng khăm pơlât. Xua mê, tơdroăng ki hbrâ kal châ pêi pro nhên vâ kơxop hlá mơéa Luât rak tơniăn ki rơkê plĕng, tơniăn ton xŏ.