Mâu kăn mơnhên tối tơdroăng ki pơkâ Luât cho vâ pro pơhlêh tŭm troăng hơlâ pơkâ, troăng prôk dêi Đảng ƀă troăng hơlâ dêi Tơnêi têa ‘na mơjiâng khu kăn pơkuâ ngăn lêng kuăn pơlê Việt Nam krá rơdêi, pêi pro châ tơdroăng púi vâ troh hơnăm 2025 kô hiăng mơjiâng khu lêng rơkê, ‘nâng ‘nâi, rơdêi; pro ivá krá rơdêi mơ-eăm hơnăm 2030 mơjiâng khu lêng kăch măng, chính quy, rơkê, ƀĕng ƀeăn, tiô chal nôkố.

Tơdroăng hơnăm cheăng dêi sih quan cho tơdroăng ki châ hên mâu kăn tơpui tối a tôh. Pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố tơdroăng ki tơ’nôm hơnăm pơtê cheăng ƀă khu lêng cho tơtro. Laga, akố cho kal tơ’nôm to lâi hơnăm vâ mơdon hâi khế pêi cheăng ƀă khu lêng ăm gá tơtro.

Xua pêi cheăng tung khu lêng kring vế, malối cho khu lêng ki xiâm, mê tơdroăng kố Khu ki chêh pro mơ-éa xuân môi tiah kơ koan séa ngăn hiăng tơmiât nhên, hriăn ngăn vâ pơkâ nhên tơ’nôm ngế ki châ pơtê hdrối tâ hơnăm pơkâ vâ rak tơniăn tơdroăng ki rơkê tơtro.