Mot măng tĭng pêi cheăng má 2 dêi Hneăng hôp má 8, kơxo kố, lơ 28/10, Kuô̆k hô̆i tơmâng pôa Vũ Hồng Thanh, Kăn pơkuâ Vi ƀan cheăng kâ dêi Kuô̆k, Kăn phŏ Khu râ kăn séa ngăn Kuô̆k hô̆i tơbleăng Mơ-éa tơbleăng dêi Khu râ kăn séa ngăn dêi Kuô̆k hô̆i ‘na tơdroăng pêi pro troăng hơlâ, luât ‘na pơkuâ kơchơ mơdró tơnêi ƀă mơjiâng hngêi ối pơlê pơla sap ing apoăng hơnăm 2015 troh tâi hơnăm 2023.

Mâu kăn teăng mâ ngăn video clip ‘na tơdroăng pêi pro troăng hơlâ, luât ‘na pơkuâ kơchơ mơdró tơnêi ƀă mơjiâng hngêi ối pơlê pơla sap ing hơnăm 2015 troh tâi hơnăm 2023. Pơtối mê, Kuô̆k hô̆i tơpui tơno a hngêi hôp kân ‘na Tơbleăng dêi Khu râ kăn séa ngăn ƀă hlá mơ-éa chêh tối hdrối Pơkâ dêi Kuô̆k hô̆i ‘na tơdroăng châ tơƀrê séa ngăn chuyên đê ‘’tơdroăng pêi pro troăng hơlâ, luât ‘na pơkuâ kơchơ mơdró tơnêi ƀă mơjiâng hngêi ối pơlê pơla sap hơnăm 2015 troh tâi hơnăm 2023’’. Mâu kăn tung Chin phuh ai tơdjâk tối tơbleăng, pro mơnhên mâu tơdroăng kăn teăng mâ Kuô̆k hô̆i tối.