Pơtối Hneăng hôp má 5, hâi lơ 21/6, Kuô̆k hô̆i tơpui tơno a Hngêi hôp kân ‘na tơdroăng tơkêa bro Luât Tơnêi tơníu (‘mâi rơnêu). Ing tơmâng xo, tiâ tối rơkong Kăn teăng mâ Kuô̆k hô̆i a Hneăng hôp má 4 ƀă ing tơmâng xo rơkong Kuăn pơlê, tơdroăng tơkêa bro Luât tơbleăng kĭ hôp kố châ mơnhên cho hiăng hơ’lêh tâi tâng ‘na châ tơƀrê hôm.

Laga, xuân ai rơkong tơpui tối tô tuăn ƀă pơkâ ‘na ‘’Troăng mơnhên yă tơnêi tiô pơkâ kơchơ mơdró’’ ƀă tơdroăng chêl thiăn, tŏng kum, vêh xĕn ối kuăn pơlê drêng Tơnêi têa xo tơvêh tơnêi têa. Hên kăn teăng mâ tối, tơdroăng mơnhên yă tơnêi ối ai hên tơdroăng pá puât, tơvâ tơvân, tá hâi môi tuăn dêi pó ƀă tá hâi tơtro.

Tơdroăng mơnhên yă tơnêi tá hâi tro khât, ôh tá hâi klâ nhên châ yă tơnêi tiô khu tơnêi. Rơtế môi khu tơnêi, tơdroăng hngêi trăng, troăng klông cheăng kâ pơlê pơla môi tiah dêi pó kô chiâng ai yă tơ-ê dêi pó. Mâu kăn teăng mâ tối, tơdroăng tơkêa bro luât tá hâi ai pơkâ mơnhên ki tro lŭp drêng tơnêi têa xo tơvêh tơnêi; tơdroăng ki tối chêl thiê̆n tá hâi tro khât, pơkâ chêl thiê̆n ‘na tơnêi, ôh tá ai pơkâ chêl thiê̆n ‘na tơmeăm ki ê.