VOV4.Xơ Đăng - Tung 4 hâi pơtê leh hâi mơjiâng tơnêi têa lơ 2/9, Đà Lạt, Lâm Đồng bú tơdah ai 85 rơpâu hdrôh tơmối. Tŭm tơdroăng ‘na ôm hyô xuân tơniăn. Tung kơxô̆ 85 rơpâu ngế tơmôi ôm hyô troh Đà Lạt, Lâm Đồng veăng pơtê Têt rôh kố ai 1.500 hdroh tơmối lâp plâi tơnêi, 13 rơpâu 500 ngế tơmối tung tơnêi têa, tung mê ai 60 rơpâu hdroh tơmối pơtê koi kơmăng.

Xua iâ tơmối troh mê mâu hngêi ăm tơmối kâ koi ối pơtê bú châ dâng 65% tê veăng ai tơmối koi pơtê. Tung plâ pơla pơtê Têt, Đà Lạt, Lâm Đồng oh tá ai tơdroăng hâ ho troăng prôk môi tiah a kơpong xiâm pơlê kong kơdrâm. Tŭm tơdroăng ôm hyô môi tiah kâ ôu, xah hêi, kơpong tíu ôm hyô ngăn xuân môi tiah hmâ, ôh tá ai hên kuăn mơngế môi tiah hdrối nah.

Tơmối ôm hyô ôh tá kơdrâ tâk hên mê pơlê kong kơdrâm Đà Lạt bâ troăng prôk ôh tá hâ ho kơdrâm mơngế môi tiah mâu rôh hdrối nah

Tiô Khu xiâm ngăn mơhno túa lĕm tro, Tơ’noăng ivá ƀă ôm hyô Lâm Đồng, ti lâi tơmối troh Đà Lạt - Lâm Đồng ôh tá hên tung rôh pơtê leh xua tơmối hiăng troh há tung mâu hâi mơ’nui măng tĭng. Môi tiah 8 khế apoăng hơnăm kố, tâi tâng kơxô̆ tơmối troh Đà Lạt, Lâm Đồng hiăng châ lối 5 rơtuh ngế, tâk 153 % tâng vâ pơchông  ƀă hơnăm nah.

Gương tơplôu ƀă tơbleăng