A mâu hngêi trung hriâm a bêng Tiến Thành (kơpong Pơlê kong kơdrâm Phan Thiết, Bình Thuận ton), mâu tơdroăng xơpá tung tơdroăng ki châ lêi tah vâ pro pơxúa tơƀrê khât tâ. Tâi tâng mâu hngêi trung hriâm râ má môi, râ má péa pơrá ai lâm hriâm tin hok châ hbrâ kơmăi vi tĭnh, kơmăi chiê̆u, loâ, ai um tơvi. Kơbong thư viê̆n châ roê ‘măn kơmăi vi tĭnh vâ tăng ngăn mâu mơéa ăm gá tơ’lêi tâ. Mâu thái cô hiăng xúa kong ngê̆ thong tin tung hnê, chêh pro yăo án điê̆n tưh. Teăng ăm xúa chêh a kơƀeăng môi tiah hdrối nah, nôkố troh a lâm cô yăo Doãn Kim Trúc, cô hnê râ má môi Đức Long, bêng Tiến Thành châ xúa phần mềm, um, video ki hleăng nhên tâ.

“Tơná á xuân môi tiah mê há, drêng châ hriâm mê ai um, khê̆n cho trưk quan sinh đŏng, tâ gá hêng vâ hriâm tâ. Ai mâu hok tro ki tá hâi hmâ ƀă tíu hriâm râ má môi, mê tơdroăng mê pro ăm vâi tơ’lêi hmâ tâ”.

Hngêi trung hriâm râ má môi Đức Long, bêng Tiến Thành ai péa tíu hriâm, kơnôm ai xúa nền tảng kơxô̆ mê mâu tơdroăng pơkuâ ngăn kăn ƀô̆, thái cô, mâu ngế cheăng ƀă hok tro xuân tơ’lêi hlâu tâ ing mâu măng xah hô̆i. Pôa Võ Thanh Long, Ngế pơkuâ hngêi trung Râ má môi Đức Long, bêng Tiến Thành ăm ‘nâi:

“Hngêi trung hiăng xúa mâu phần mềm ứng dụng tung cheăng môi tiah: phần mềm rak ngăn mâu hlá mơéa ki kal, phần mềm mâu nôu pâ hok tro nâp liăn hiăng châ nâp ing phần mềm kố. Hngêi trung hiăng krâ ‘măn tơ’nôm a mâu tíu pơchuât mơéa pŭn toăng kơmăi vi tĭnh vâ hok tro tung pơla chôu lo xah hêi vâi lăm troh tăng ngăn mâu tơdroăng ki vâi kal vâ ‘nâi tung Google vâ ‘nâi tơ’nôm”.

Mâu hngêi trung hriâm ki ê a bêng Tiến Thành xuân hiăng xúa kong ngê̆ kơxô̆ sap ing rak ngăn hok tro, pơcháu ƀai tâp, chêh pro yăo án troh tơkŭm hnê hriâm a lâm. Malối, tơdroăng ki xúa kơmăi mơđah ƀă mâu tơmeăm xúa điê̆n tưh tung rêm chôu hriâm pro ăm tơdroăng hnê chiâng khât tâ, hâk vâ hriâm tâ ƀă tơ’lêi chôu pâ tâ. Pôa Phạm Thái Hùng, Phŏ pơkuâ Hngêi trung râ má péa Nguyễn Đình Chiểu ăm ‘nâi, hdrối nah mâu tíu chêh ‘măn mơéa kal dêi hngêi trung hmâ rak ƀă kơtâ mơéa mê nôkố tâi tâng châ rak ‘măn tung kơmăi dêi VNPT.

“Hngêi trung xuân dế hriăn ngăn ai phần mềm ki lâi tơƀrê tâ, rơpâ tâ ƀă pơkí gá hên tâ ƀă hlối séa ngăn tâng ai tŭm tơdroăng mê rak ngăn hok tro ing măng phôn râng kŏng troh hngêi trung vâ pro ƀai môi tiah lâi. Xua mâu vâi o hok tro akố ối hên xơpá, ôh ti xê rơpŏng hok tro ki lâi xuân ai phôn râng kŏng vâ ăm dêi kuăn xúa tung tơdroăng ki hriâm. La drêng ai tŭm tơdroăng ăm mâu vâi o pro ƀai tung kơmăi tĭnh lơ a phôn râng kŏng gá kô kơdroh iâ ki pá ‘na tơdroăng cheăng”.

Mâu hngêi trung hriâm a Tiến Thành rơhêng vâ, vâ cheăng pơhlêh xúa kong ngê̆ ai pơxúa ƀă tơƀrê khât tâ, kơvâ cheăng ki ai tơdjâk troh kal pơtối tơkŭm hnê, tơ’nôm ki rơkê, tơdroăng xúa phần mềm ăm thái cô. Tơdrêng amê hlối ai troăng tŏng gum mâu phần mềm  drêng xúa athế nâp liăn. Pakĭng mê, tíu chêh ‘măn tơdroăng kal ‘na tíu kuăn pơlê ối rĕng pro klêi, tro vâ mâu hngêi trung chêh pro klêi học ƀă ing kong ngê̆ kơxúa.