VOV4.Xơ Đăng - Kong pơlê Gia Lai hiăng ƀă dế pêi pro mâu troăng pêi thâ vâ hbrâ ví ƀă kong mêi khía mơhot roh má 4. Môi tung mâu hnoăng cheăng ki kal châ pơlê kong kơdrâm Pleiku pêi pro mê cho kui tah trâp hno têa, trốu tơkâng loăng tung kơpong kơdrâm kuăn pơlê rêh ối tê mơdró vâ ví têa lân lu ƀă loăng kơtong kơđôu drêng trâm kong mêi khía mơhot.

Vâ teăm hbrâ ví kong mêi khía mơhot roh má 4 plong mot, tung mâu hâi hiăng hluâ ƀă troh kơxê lơ 27/9, Ƀơrô Pơkuâ kơpong kuăn pơlê rêh ối kơdrâm pơlê kong kơdrâm Plei Ku tơrŭm ƀă Kŏng ti pêi cheăng tiô rơnó môi khu Tơmeăm Tíu kơdrâm kuăn pơlê rêh ối tê mơdró pơlê kong kơdrâm Plei Ku trốu tơkâng hrĭng xiâm loăng tŭm túa, môi tiah loăng xà cừ, loăng tróu, ƀă mâu loăng ki ê ai tơkâng rơdâ, a troăng Lê Hồng Phong, Lê Duẩn, Phan Bội Châu.

Rơtế amê, mâu tíu cheăng tơkŭm kui tah trâp mâu hno têa, kui tah trâp troăng têa hiu a mâu têa plông tung pơlê kong kơdrâm.

Tiô tối tơbleăng dêi Tíu xiâm pơtâng tối hyôh kong prâi dêi Lâm Đồng, xua tơdjâk dêi khía mơhot kân rôh má 4, tung 48 chôu troh 72 chôu la ngiâ, a kong pơlê Lâm Đồng ai mê kân ƀă mê kân khât, hên tíu mơni kô tro têa lân, khía mơhot ƀă tơhnah tơhnâp tơnêi. Hnoăng cheăng hbrâ ví khía mơhot kân rôh má 4 dế châ mâu khu ki ai tơdjâk troh dêi kong pơlê Lâm Đồng dế tơbleăng kơtăng.

Lâm Đồng, Gia Lai hbrâ ví kong mêi khía mơhot roh má 4

Tiô tối tơbleăng, khía mơhot kân rôh má 4 ôh tá plong mot tơdrêng a kong pơlê Lâm Đồng la xua khía mơhot ai ivá têi, hyôh khía kân mê kong pơlê kố tro tơdjâk dêi kong mê kân ƀă khía têi, mơni kô pro têa lân lu, mơhiu ƀă tơhnah tơhnâp tơnêi.

Xua mê, Khu pơkuâ ‘na hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ kong pơlê Lâm Đồng hiăng pơkâ thế mâu tơring, pơlê kong kơdrâm, mâu kơ koan ki ai tơdjâk rĕng tơbleăng mâu tơdroăng ki hbrâ ví, pôi tá tơngôu.

VOV Tây Nguyên/Tơplôu: A Sa Ly - Katarina Nga