Ƀă dó inâi ‘’Đà Lạt – Pơlê kong kơdrâm pŭn rơnó reăng’’, Festival reăng Đà Lạt roh má 9 hơnăm 2022 tơkŭm po tung pơla 2 khế, sap ing hâi lơ 1/11 troh tâi hâi lơ 31/12. Rơtế ƀă mâu tơdroăng ki xiâm tơkŭm po ki hên a pơlê kong kơdrâm Đà Lạt, lối 40 tơdroăng mơhnhôk pêi pro xuân tơkŭm po tung lâp mâu tơring tung kong pơlê.

Nôkố mâu tơdroăng mơhnhôk hiăng chôa ‘lâng tơkŭm po a mâu tơring, pơlê kong kơdrâm tung kong pơlê, môi tiah: Khu sâp ếo xŏn reăng, mơđah tơbleăng mâu tơmeăm pêi lo ing chiâk deăng, leh xah hêi drôu vang plâi hơmu ki tum lĕm ƀă hía hé.

Tiô pôa Sử Thanh Hoài, Kăn hnê ngăn Vi ƀan tơring Lạc Dương, kong pơlê Lâm Đồng, tơring hiăng hbrâ ăm mâu tơdroăng pêi môi tuăn tơniăn tơkŭm po dâi lĕm ƀă châ tơƀrê păng ‘nâng:

“Pêi pro troăng hơlâ dêi Vi ƀan kong pơlê ‘na tơdroăng mâu tơring tung kong pơlê thế veăng mâu tơdroăng vâ mơhnhôk Festival reăng Đà Lạt, tơring Lạc Dương xuân ai mâu tơdroăng pêi vâ mơhnhôk. Mê cho rơnó leh xah hêi nhâ khêi tiô tối hdrối pơxiâm po a hâi lơ 19/11, rơtế a mê cho tơring Lạc Dương xuân tơkŭm po tơ’noăng kơchâi kâ, tn chêng koăng, tơrŭm mâu khu mơdró tơkŭm po leh xah hêi tơ’noăng to xêi ôh tá ai kế an ‘nân a cheăm Dà Nhim’’.

Rơtế ƀă khu râ kăn pơkuâ tơring, mâu tíu mơdró ôm hyô môi tiah hngêi mơdró ôu kâ, hngêi ăm tơmối kâ koi ối pơtê, kơpong lăm ngăn ôm hyô ƀă hía hé xuân hbrâ mâu tơmeăm ki kal vâ tơniăn kum ăm tơdroăng kal vâ dêi tơmối. Pôa Đinh Thiên Long, ngế pơkuâ môi hngêi mơdró ô kâ a Tíu xiâm  pơlê kong kơdrâm Đà Lạt tối ăm ‘nâi, vâ môi tuăn Festival reăng Đà Lạt roh kố, pakĭng mơdêk tơdroăng mơdró, hngêi mơdró ôu kâ dêi pôa hiăng hbrâ mâu kơchâi kâ ki kơhiâm châ pro ing mâu kơchâi drêh, pôm, plâi... djâ ki phá krê tơ-ê dêi Đà Lạt.

“Hdrối Festival mê tơdroăng apoăng mê ngin kêi đeăng ki lĕm dêi môi hngêi mơdró ôu kâ ‘na tơdroăng tơdah tơmối, ‘na mơgrúa lĕm tơmeăm kơchâi kâ, kế ôu vâ tơdah hên tơmối ôm hyô. Đà Lạt ai tơmeăm kâ hên hĭn, xua mê á pói vâ tơmối kô châ kâ, châ ‘nâi tâi tâng ‘na kơchâi kâ dêi kuăn pơlê a pơlê kong kơdrâm reăng kố’’.

Pakĭng mâu tơdroăng hơdruê xuâng, xah hêi, mơđah tơbleăng mâu tơmeăm pêi lo ing chiâk deăng djâ inâi ‘’Đà Lạt – chiâng ing tơnêi ki lĕm’’, reăng cho tơdroăng ki xiâm dế châ khu râ kăn pơkuâ pơlê kong kơdrâm, kuăn pơlê ƀă khu tê mơdró thâ hbrâ vâ kum tung tơdroăng kal vâ châ ngăn reăng dêi tơmối ôm hyô, ki má lối mâu reăng ki pro rơnuâ lĕm ‘măn a mâu kơpong tơdjuôm pơlê pơla, mâu troăng kân ki xiâm ƀă rơtâ tá long têa Hồ Xuân Hương.

Krê Kŏng ti rơnuâ pro lĕm pơlê pơla Đà Lạt hiăng hbrâ lối 400 rơpâu kơ’lo  reăng tŭm túa vâ mơjiâng pro tíu tâ ‘măn reăng, rơnuâ pro reăng a mâu troăng reăng tung roh Festival reăng kố.