­Klêi tơ’mot tơdjuôm Lâm Đồng, Bình Thuận ƀă Dak Nông , kong pơlê Lâm Đồng  ai tơnêi rơdâ lối 24.000 km2 - rơdâ má môi tung lâp tơnêi têa, ƀă vâ chê 4 rơtuh ngế kuăn pơlê. Lâp tung kong pơlê ai lối 2,7 rơtuh kuăn pơlê. Kong pơlê Lâm Đồng ai 6 tíu tâ phĭu rah xo kăn Kuô̆k hô̆i  (rah xo 17 ngế) ƀă 38 tíu tâ phĭu rah xo kăn hnê ngăn Hô̆i đong kuăn pơlê kong pơlê (rah xo 85 ngế). A râ cheăm ai 1.004 tíu tâ phĭu, 2.301 kơpong tâ phĭu vâ rah xo 2.949 ngế kăn.

Troh nôkố kong pơlê hiăng pê klêi tơdroăng mơjiâng, chêh inâi mâu ngế lăm tâ phĭu, inâi mâu ngế lo tơbriêt pro kăn ƀă hbrâ tŭm mâu tơdroăng tơkŭm tâ phĭu. Hô̆i đong tâ phĭu tơnêi têa xuân vâ môi tuăn ăm phêp kong pơlê Lâm Đồng tơkŭm po tâ phĭu rĕng tâ a 5 kơpong a hâi lơ 14/3, dêi mâu lêng Mố đô̆i gak tơkăng kong pro đông a mâu cheăm Hàm Tân, Thuận Hạnh, Thuận An (2 kơpong) ƀă cheăm  Đắk Wil.