Pâ vế rơkong hnê dêi Pôa Hồ ki pin nhuô̆m, kơvâ hnê hriâm hnê mơjiâng tuăn ngôa rơkê kong pơlê Lâm Đồng đi đo pơhlêh nếo, mơ-eăm tơkâ hluâ pá puât, mơdêk ki hôm tung hnê hriâm tâi tâng; tơtrŏng hnê hriâm ihiâm tuăn lĕm, ihiâm mơno rêh, mơnhông ihiâm mơno pôu râng hnoăng cheăng, pói vâ pleăng hnoăng cheăng ƀă tơdroăng mơ-eăm tung khu kăn ƀô̆ pơkuâ, thái cô ƀă hok tro.

A hâi leh ai 15 khu pú hên ƀă 69 ngế krê ki kơhnâ rơkê tung hriâm tâp ƀă pêi tiô ihiâm mơno, ihiâm tuăn, troăng pêi cheăng Hồ Chí Minh châ kheăn kơdeăn; 104 ngế hok châ kâ pri a Hneăng tơ’noăng rah xo hok tro rơkê tơnêi têa hơnăm 2025 – 2026 ƀă 134 hok tro châ kâ pri Má môi Hneăng tơ’noăng hok tro rơkê râ kong pơlê hâk mơnê tơdah Ƀâng kheăn kơdeăn dêi Khu xiâm pơkuâ hnê hriâm ƀă Hnê mơjiâng tuăn ngôa rơkê, Ƀâng kheăn kơdeăn dêi Viƀan kong pơlê Lâm Đồng ƀă Mơ-éa kheăn kơdeăn dêi Khu pơkuâ hnê hriâm ƀă Hnê mơjiâng kong pơlê.